Shillong, Jymmang 23: U Nongialam ka Liang Pyrshah Dr. Mukul Sangma u la ther tyngeh ia ka sorkar kmie bad kumjuh ruh ia ka sorkar jylla halor ka jingbym lah ban weng ne pynkut noh ia ka kynrum kynram hapoh ka skul Bah North Eastern Hill University (NEHU).
“Kadei ka kamram jong baroh ar tylli kata ka sorkar kmie bad ka sorkar jylla ba kin shong bad ban wad ia ki lad ki lynti ban pynbeit noh shi syndon ia kane ka jingjia ha ka skul Bah” ong u Dr. Mukul.
Katkum ka jingong une u Myntri Rangbah barim ka Jylla, “kam long kaba sngewtynnad ban ia kren halor kane ka mat”.
U la ong ba ka jingpynslem ban weng noh ia kane ka jingeh ha NEHU ym tang ba kala ktah ia ka kyrteng bad ka nam ia kane ka skul Bah jong ka sorkar kmie, ia kaba baroh ki ju shim ka jingsngew sarong ia ka jingdon jong ka.
“Dei halor kane, la kyntu ia ka sorkar jylla bad ka sorkar kmie ban pyntikna ia kane ka mat yn lah ban pynbeit noh kloi katba lah khnang ba kane ka kyrteng bad ka nam jong kane ka skulbah” u la ong.
Ha ka sngi Palei ka kynhun na ka Ministry jong ka tnad pule puthi kila leit ban iuh kjat ha NEHU ban review ha kaba iadei bad ka jingtrei kam jong kane ka skulbah.
.){kind=link}