Nongpoh, Jymmang 23: Kum ka sienjam ban iarap plie lad plie lynti ia ki samla ba kin ioh ia ka rynsan ai jinghikai bad ki jingtip ba kongsan ban sengkam sengjam lade, Ka PRIME Meghalaya ha ka sngi Thohdieng, ka la plie paidbah ia kaka PRIME Startup Hub ha Down-gate Nongpoh, Ri-Bhoi District.
Ia kane ka Prime Hub la plie da u Bah Jonathan Shylla, Additional Deputy Commissioner ka Ri Bhoi District kum u kongsan ha ka jingiadonlang ruh u Pranjal Konwar, COO ka IIMCIP, u Bah Keningstar Nongrum, Administrative Head jong ka PRIME Hub nalor kiwei kiwei ki riew rangbah.
Kane ka PRIME Hub ka dei kaba la pynwandur ban ai ka jingkyrshan ia ki nongshongshnong ka thain ha ka seng kam seng jam bad da ka jingdon jong ka jaka ba kyrpang ha Nongpoh, ki nongseng kam seng jam mynta kin ioh ia ki jingshakri bad ki jingdonkam, ki prokram pynroi ia ki sap, ka jingai jingmut, bad ki lad ban pyniar ia ki kam—baroh hapoh kawei ka tnum.
Haba kren kum u kongsan, u Bah Jonathan Shylla u la ai jingiaroh ia ka sienjam ban wanrah ia kane ka shant jong ka Prime Hub ha Nongpoh ban pyniajan ia ki samla sha ki lad jingtip bad jinghikai kiba kongsan na bynta ba kin lah pat ban sengkam sengjam lade bad ban ieng ha la ki jong ki kjat.
U la kyntu ruh, ia ki samla kiban shimbynta ha ki programme bapher bapher ba kin sngap thuh bad pynleit jingmut bha ia ki jingbatai bad ki jinglam lynti lyngba ki nongpeit nongkhmieh jong ka Prime Hub khnang ba kin lah ban pyndonkam pat ia kita ki lad ha ki kam ba ki thmu ban seng.
