Jowai, May 21: U Myntri Rangbah ka jylla u Conrad K. Sangma hynne ka sngi Balang ula pynpaw ba ka jingkordor jongka Projek ym dei ban bishar katkum ka jingbhah tyngka ia ka hynrei ia ka jingktah ia ka jingim ki briew. Ula ong ia kane haba plie ia ka Hubert Rosario Road ha Spein ha Mookaswan, ka surok kaban mih sha Hubert Acupressure Centre.
Kane ka surok kaba la shna thymmai ha West Jaintia Hills ka long kumba 1.13 km bad la shna ha ka jinglut kaba kot T. 1.93 Klur.
“Kane ka surok ka lah ban dei ka projek kaba T. 1.93 Klur ha ka jingmang tyngka hynrei ia nga hi ka long ka bym don dor ha ka rukom ba ka ktah ia ka jingim khamtam eh ia kito kiba pang, kiba leit wad ia ka jingsumar bad ia ki Sister kiba aiti met bad mynsiem ban ai ia ka jingsumar” ong u Myntri Rangbah.
Haba kren shaphang ki sienjam kiba la shim da ka sorkar ha kaba iadei bad ka roi ka par, ula pyntip ba ka jylla kala kynshew ha ki jingtei ki bapher bapher. “Watla tang T.659 Klur kadei ia ki projek shna surok kiba la mang hapdeng u snem 1991 haduh u 2018, hynrei la mang haduh T.4,000 Klur tang ha kine ki 7 snem kiba la dep. La kumno kumno kumba 70% jong baroh ki surok kiba la shna lyngba ka Pradhan Mantri Gram Sadak Yojana (PMGSY) ha ka jylla kidei kiba la dep ban shna ha kine ki snem” ula ong.
Ula ong, ba ka Meghalaya kala sdang ban long kum kawei na ki jylla kaba la ialam ha ka jingbei tyngka ha ka liang ka koit ka khiah, ha kaba palat 8% jong ka mang tyngka kaba shi snem jong ka jylla, palat ia ka T.1,000 Klur la bei ha ka liang ka koit ka khiah.
“Ka sorkar ym tang ba ka kyrshan ia ki hospital sorkar hynrei kala iatreilang ruh bad ki hospital kiba la pyniaid da ki Balang”.
Ula pyntip ruh ba ka Rural Health Center kum ka Hubert Acupressure Centre kadei kaba la pynkhreh ban kynthup ha ka wat kaban sa wan ban ioh ia ka grant.
U Myntri Rangbah ula pyntip ruh ba ka sorkar kala shim ia ka rai ban kyrshan ia ka jingai jingsumar tynrai kiba don ha kylleng jong ka jylla, ban pyniar ia ka jingnang jingstad tynrai ha kaba iadei bad ka rukom ai jingsumar.
U Symbud Myntri Rangbah ka jylla u Bah Sniawbhalang Dhar, haba kren ha ka jingialang ula ai jingiaroh ia ka shnong ka thaw halor ka jingiatylli ka jongki bad ia ka jingdon mysniem bad ula pynpaw ia ka jingsngewsarong ban iadonbyntalang bad ka thain Mookaswan bad ula iaroh ia ka jingtrei met bad mynsiem ki Sister ha kaba iadei bad ka jingai jingsumar.
Ha kane ka jingialang la iadonlang u Archbishop Victor Lyngdoh jongka Shillong Diocese, u Bishop Ferdinand Dkhar jongka Jowai Diocese, u MLA ka Jowai u Bah Wailadmiki Shylla, ki heh ophisar na ka tnad Public Works Department bad ki nongialam shnong.
