Shillong, Jymmang 21: Ka Directorate of Sports & Youth Affairs ka Jylla ryngkat ka jingiatreilang bad ka Meghalaya Athletics Association, kala plie pyrda ia ka State Level Inter-School Athletic Meet 2025 ha ka sngi Baar ha SAI STC, NEHU Shillong Campus.
Katkum ka kyrwoh na u Director jong ka Directorate of Sports & Youth Affairs ka sorkar jylla u DD Shira ula pyntip ba kane ka lympung ialehkai kala sdang ha ka20 tarik bad kan kut ha ka 22 tarik u Jymmang bad kadei ka rynsan kaba ki nongialehkai ka jylla kin ioh ban pyni ia ka sap ka phong ka jong ki.
Ha kane ka jingplie ia kane ka jingialehkai, u Richard Yanthan, IAS, Joint Secretary, ka Sports & Youth Affairs ula long u Kongsan, u bah John F Kharshiing, Working President jongka Meghalaya State Olympic Association (MSOA) ula long kum u symbud kongsan ha kaba la idonalng u D. D Shira, MCS, Director ka Sports & Youth Affairs, u Bah Finely Pariat u General Secretary ka MSOA bad kiwei kiwei ki heh ophisar jong ka tnad Sports, Police bad ki bor pyniaid jong ki skul, ki nongmihkhmat na ka Meghalaya Athletics Association bad ki khynnah pule.
La sdang ia ka prokram da ka jingpynher ia ka lama kum ka jingsdang ia kane ka lympung iakob ialehkai kaba 3 sngi ha kaba yn pynlong ia ki jingialehkai ki bapher bapher.
Haba kren ha ka jingialang u Richard Yanthan ula ong, “Kane ka lympung kadei ban ithuh ia ka bor jong ka kam ialehkai bad ki nongialehkai ha kaban saindur ia ka jingim ka jongki khamtam eh ia ki khynnah samla, Ka sorkar ka iengskhem na ka bynta ban tei ia ka Meghalaya kum ka jaka pdeng kaba tbit ha ka kam ialehkai ha ki snem ban wan bad ka sorkar kala bei tyngka ha kaban tei ia ki jingtei bad kane kadei ka sakhi lyngba ki skhim bad ki polisi ki bapher bapher kiba la pyntyreikam”.
Ula ong, ba kane ka lympung kadei ruh ka jingkular ia ka lynti iaid ne ka roadmap, kaba kdew ia ka jingpyrshang jong ka sorkar ban shimkhia ia ka jingkongsan ban kyntiew ia ka kam ialehkai bad ban ia ka roi ka par jong ki samla ka jylla.
Katba u Bah John F Kharshiing, ula ong ba kane ka lympung ialehkai ka long kaba kongsan khamtam haba ka jylla Meghalaya ka dang pynkhreh ban pynlong ia ka 39th National Games ha u snem 2027. Ula ong ba kane ka Athletic Meet ka long kum u mawjam ban tei ia ka kolshor ha ka kam ialehkai.
U DD Shira ula pynbna ba kane ka State Athletic Meet kadei ka rynsan kaba wan iashimbynta da ki 780 ngut ki nongialehkai na ki district jong ka jylla ban iashimbynta ha ki 48 tylli ki jait jingiakob ialehkai ha ki rta ki bapher bapher ha ryngkat bad ki 36 ngut ki nongpyniaid ne Officials bad 200 ngut ki Volunteer kiban ai jingkyrshan ha ki jingialehkai ki bapher bapher.
