Shillong, Jymmang 21 : Ka Iingkashari Meghalaya High Court kala buh ia ka 13 tarik Jylliew kum ka sngi ban shong bishar ia ki aplikeshon ban pynkut noh ia ka jingbishar kam bymman pyrshah ia laingut ki nongshah kynnoh kynthup ka Myntri Sorkar Kong Ampareen Lyngdoh ha ka jyrsieh thungkam Nonghikai u snem 2009.
Ka Iingkashari bala khlieh da u Chief Justice IP Mukerji ha ka hukum ba pynmih ha ka sngi Ba-ar kala ong “Buh ia kine ki aplikeshon ban nang shong bishar biang ha ka 13 tarik Jylliew, 2025. Baroh ki hukum bala pynmih hashuwa kin dang iai treikam tad haduh da dep bishar pynwai ia kine ki aplikeshon lane tad da pynmih da kawei pat ka hukum, kat kaba kloi”.
Ka hukum ka ong ba ka jingbishar kam bymman kala mih na ka ingjied bad jingthung ia ki Assistant Teacher ha ki skul Lower Primary ka Sorkar Jylla ha u snem 2008-09. Ia kane ka case la tohkit da ka Central Bureau of Investigation (CBI). Ka jingkynnoh pyrshah ia ki nongshah kynnoh ka long ba kila pynkylla ia ka rukom jied da ka tad sia lieh, shna thok ia ka result sheet jong ka eksam ban iarap ia ki kyrtong ba ki mon.
Ka ong ba ka aplikeshon hapoh ka kyndon 482 jong ka Criminal Procedure Code mynta ka Bharatiya Nagarik Suraksha Sanhita (BNSS) la aiti sha ka Iingkashari da ki lai ngut ki nongshah kynnoh ba kyrpad ban khein iap ia ka jingbishar. Ka CBI ruh kala buh ia ka aplikeshon hapoh ka Iingkashari ba ujor ia ka hukum bala pynmih da ka Criminal Court.
Ha ka jingbishar, u Salman Khurshid, u nongiasaid ain bala rangbah, ula pynwai ia ka jingiasaid na ka bynta ka nongshah kynnoh ba nyngkong, kaba dei ka Myntri ha ka Sorkar Jylla.
U Paul, nongiasaid Ain bala rangbah, ula sdang ia ka jingiasaid na ka bynta u nongshah kynnoh uba ar, uba dei u Director ha ka Tnad School Education ka Jylla ha katei ka por.
Une u Nongiasaid ula pan por ban lum thup ia baroh ki jingkynnoh kiba long pyrshah ia u briew jong u napdeng kiba bun ki jingkynnoh kiba la kynthup ha ki jingkynnoh bala dep ban aiti.
Ka iingkashari kala aipor bad bthah ba ia ka jinglumthup dei ban wanrah hapoh ka 4 tarik Jylliew.
