Nongpoh, Jymmang 15 : Ka Tnad Public Health Engineering (PHE)-Nongpoh Division, kala pyntip ba ka daw jong ka jingtyr khong um ha sor Nongpoh ka dei tang namar ka jingdon ki riew paidbah kiba tuh ia ka um na ki pipe jong ka Tnad.
Ka Tnad PHE kala tan ia ka um na ka jaka pyllang um ha Nongthymmai bad la pyniaid ia ki pipe um lyngba ka Wah Umran ban poi sha ka Treatment Plant kaba don ha Iewmawlong.
U Executive Engineer ka PHE-Nongpoh Division Bah U Kurbah ula iathuh ba ka Tnad kala iohpdiang ia shibun ki jingujor halor ka jingdon jong ki briew kiba tuh ia ka um na ki pipeline jong ka Tnad hashuwa ba ka um kan poi sha ka Treatment Plant ha Iewmawlong bad ban sam sha ki paidbah ka sor Nongpoh.
Ula ong ba kane ka jingtuh ia ka um na ki pipe ka Tnad kala pynduna ia ka jingpoi ka um sha ka Treatment Plant bad lam sha ka jingduna ka um ban sam sha ki paidbah ka thain Nongpoh.
Hynrei u ong ba watla katta, ka Tnad kala hiar jurip ia ki katto katne ki bynta ba don ka jingshah tuh ka um bad kala shim ruh ia ki sienjam ban pynduh ia katei ka jingtuh um hynrei ki briew ki dang jop hi bad ki dang bteng beit ban leh ia kane ka kam.
Halor kane, une u Engineer ula kyntu ia ki briew ba kin sangeh noh ia kane ka jingtuh um na ki pipeum ka Tnad hashuwa ba ka um kan poi sha ka Treatment Plant namar kane ka um kam long satia kaba shngain ban dih kat bym pat dep pynkhuid ia ka ha ka Treatment Plant.
