Shillong, Jymmang 15: Kum shi bynta jong ka jingai jingiarap ia ki Hospital ha ka jylla lyngba ka Meghalaya Healthcare Advancement Policy (MHAP) 2024, u Myntri Rangbah ka jylla u Conrad K. Sangma hynne ka sngi Balang, ula pyllait iaka jingai jingiarap kaba T.2 Klur ia ka Dr. H. Gordon Roberts Hospital, Shillong. Ka jingthmu jong kane ka jingai jingiarap da ka pisa ka long ban weng iaka jingeh kaba mad da ki hospital kiba la pyniaid da ki mishoneri kiba la ai jingshakri kaba la slem bha ia ki paidbah ka jylla Meghalaya.
Haba kren ha ka jingialang kum u Kongsan, u Conrad Sangma ula pynpaw ia ka jingsngewnguh ia ka kam kaba la leh da ki jaka ai jingsumar jongki mishoneri bad pynpaw ba ka sorkar ka kular skhem ban pynkhlain ia ki jaka ai jingsumar ha kylleng jong ka jylla.
Ula ong, ba ka Meghalaya kumba long mynta kala pynlut ia palat 8.5% na ka mang tyngka ka jongka, ha kaba iadei bad ka koit ka khiah, kaba heh tam ha baroh ki jylla jong ka ri India. Ula bynrap ba kane ka jingbhah tyngka kala pynmih ia ka resol kaba bha, ha kaba kala lah ban pynduna da 45% ia ka jingkhlad noh jong ki kmie kiba punkhun, kaba dei ruh kaba la phaikhmat bha ha ka ri bad ha ka pyrthei baroh kawei.
“Ngi ngim don hangne tang na ka bynta u 2024. Kane kadei ka jingiatreilang kaban iaid ha ka lynti kaba jrong. Ka hospital ka jong phi, ka Governing Body ka jong phi kan shim ia ka rai kaba bha tam. La kadei ia ki jingtei, ki tiar ki tar ha ka ICU ne ki tiar kiba thymmai, ka bhah tyngka kadei ka jong phi ba phin pyniaid katkum ka jingshemphang ka jong phi” ula ong bad ka pynthikna ba kin ioh ia ka jingkyrshan man la ka snem hapoh jongka MHAP.
Ia kane ka prokram la pyniaid da u Rev. S.S. Majaw, Chairman jongka Hospital Governing Board bad la sdang da kaba buh ia ka jingduwai da u Rev. K. Laloo, Secretary jongka Central Organising Committee bad la pynbud pat da ka jingkren pdiang sngewbha da u Dr. Meban Aibor Kharkongor, Consultant ha ka Medicine.
U Dr. Kenneth R.L. Nongpiur, Deputy Medical Superintendent, ula ai ka jingkren kaba bniah halor ka ki projek kiba la bei tyngka da ka MHAP kaba kynthup ia ka jingtei thymmai iaka Adult bad Paediatric ICU Complex, ka jingbuh ia ka Solar Energy Plant ban ioh ia ka bording, ban thied ia ki tiar ban ai jingiada iaka jingim ne Life Saving Equipment bad ban thaw ia ka kynhun kaba pura kaban ai jingsuamr ia ki jingpang ki bapher.
Kane ka project, kaba la antad ba ka jinglut kan kot sha ka T.2.95 Klur, kadei kaba la khmih lynti ban pyntreikam ha ki 4 tylli ki wat hapdeng jong ki 18–24 bnai, kaban kynthup ia ki jingtei, ka jingai jinghikai ia ki nongtrei, ka jingwad bniah bad kiwei kiwei.
U Dr. Nongpiur ula pynpaw ba ka ICU Complex kan ai iaka jingsumar kaban kot bor ha kaba iadei bad ka jingai jingshakri ia ki khunlung kiba dang shu dep kha, ki khynnah bad ia ki kmie khamtam eh ia kito kiba wan na ki longing kiba duna ha ka ioh ka kot bad kiba na ka thain nongkyndong. Ula banjur ba ka hospital ka treikam ha ka jingai ia ka dor kaba biang bad ka pynpaw ba yn pyndonkam ia ka MHIS (Meghalaya Health Insurance Scheme) bad ka Poor Patient Fund ban pynthikna ba kino kino ki nongpang kin ym phet na ka daw jong ka jingshem jingeh ha kaba iadei bad ka pisa pilain.
La ai ruh iaka dorkhas ha u Myntri Rangbah ka jylla da u bah K.W. Marbaniang, Administrative Officer, ban pan shuh shuh ia ka jingkyrshan, kaba kynthup ia ka jingbei tyngka naka bynta ban thied ia ki tiar Laser Lithotripsy na ka bynta ka jingsumar ia kiba don maw ha u khyllai, ka jingbteng ban ai jingkyrshan na ka bynta ban tei ia ka G+5 hospital kaba thymmai bad ka jingkyrshan pisa na ka bynta ban tei ia ka Academic Complex jongka College of Nursing.
U Myntri Rangbah ula pdiang ia kine ki jingkyrpad bad ula pynthikna ia ki bor pyniaid jong ka hospital ban khmih bniah bad ka pynpaw ba ka sorkar ka iengskhem ha kaban ai jingkyrshan ia ki hospital kiba la pyniaid da ki mishoneri kiba don ha kylleng ki bynta jong ka jylla.
