Shillong, Jymmang 10 : Ka Hynniewtrep Youth Council (HYC) ha ka sngi Saitjain kala rai ban pynsdang ia ka “Sierlapalang Operation” pyrshah ia ki mynder ri be-ain kiba wan rung shapoh ka Jylla Meghalaya.
Haba iakren bad ki lad pathai khubor hadien ka jingialang CEC, u President ka HYC Roykupar Synrem ula ong “Ngi la rai ban pynsdang ia ka “Sierlapalang Operation” pyrshah ia ki mynder ri beain kiba wan ban wadkam wadjam ha Jylla”.
“Kane ka jingkhynra ka long ban lap ia ki mynder ri kiba sah ha Meghalaya khlem ki kot ki sla kiba biang, ka registration. Ka Meghalaya kala dep pyntreikam ia ka Ain Meghalaya Identification, Registration, Safety and Security of Migrants Workers Act, 2020. Kat kumkane ka ain, baroh ki nongtrei bar jylla ki hap ban register hapoh kane ka Act. Ngi kwah ban pynthikna ba baroh ki nongbylla bar jylla ki dei ban register bad lada shem ba ki khlem pat register bad ym bud ia ki kyndon ka ain, ki dkhot jong ki kin leh ia kaba donkam kat kum ka Ain” ula bynrap.
Ula ong ba ym don ba lah ban kyntait ia ka jingshisha ba da ka jinglong jingman hapdeng ka India bad Pakistan, kila don ki khubor halor ka jingwan rung tuh ki mynder ri hapoh ka Jylla.
Kat kum ka kaiphod na ki Heh BSF, kila ioh ban kurup ia bun ngut ki nongrung beain.
“Wat ki dkhot jong ngi na khappud ka Bangladesh, kilaioh bat ia ki nongwan rung tuh bad kila aiti ia ki sha ki Pulit. Lada ym lah ban tehlakam ia ka jingwan rung tuh na Bangladesh, ka jingshngain jong ka Jylla kan sa shah ktah bha bad kumjuh ruh ka ri baroh kawei” ula ong.
“Namar kata, ngi la bthah ia baroh ki Unit bad ki Dkhot jong ki kiba don ha ki thain khappud ka Bangladesh ba kin peitngor bha bad lada ki ishankhmat ia kino kino ki briew, ki dei ban bat bad aiti sha ki Pulit ba kin pynthikna bad leh ia kaba donkam” ula ong.
 ha ka sngi Saitjain kala rai ban pynsdang ia ka “Sierlapalang Operation” pyrshah ia ki mynder ri be-ain kiba wan rung shapoh ka Jylla Meghalaya.){kind=link}