Guwahati, Jymmang 9: U Myntri Rangbah ka Assam Himanta Biswa Sharma, ha ka sngi Palei u la kyntu ia ki paidbah ka jylla ban pynkut noh da kaba suk ia ka jingrakhe Bihu haba kyrpad ban pynsangeh noh ia baroh ki jinglehniam ba dang sah naduh ka 10 tarik u Jymmang shaneng.
Ha ka khubor paidbah, u myntri rangbah ka jylla u la pynpaw ia ka jingsngewnguh kaba khraw ia ki paidbah ka Assam kiba la iashim bynta da ka jingkmen ha kane ka tamasa Rongali Bihu kaba la neh shibnai.
“Ha une u bnai ba la dep, ngi la rakhe da ka jingkmen ia ka Bihu ha kylleng ka Assam lyngba ki jinglehniam kiba bun jait.Nga ai khublei shibun eh ia baroh na ka bynta ka jingiashim bynta bad jingnoh synniang kaba sngewtynnat jong ki,” u la ong.
U Myntri Rangbah ka Assam, Haba pynpaw ïa ka jingïatylli bad ka jingsarong ha ka kolshor kaba la pynpaw ha kane ka tamasa, u la kdew ba mynta ka la dei ka por ban pynkut noh ïa ka aiom lehkmen. “Nga kyrpad da ka jingsngewrit ba baroh ka jingleh kmen Bihu kiba dang sah kiba la buh por naduh ka 10 tarik u Jymmang shaneng kidei ban pynsangeh noh bad to ngin pynkut noh ïa kane ka jingrakhe, da kajuh ka jingïatylli bad ka mynsiem ha kaba la rakhe ïa ka,” u la bynrap.
Ia ka Rongali Bihu, kaba dei ka jingrakhe snem thymmai jong ki Assamese, la rakhe da ki jingrwai, ki jingshad, bad ki jingialang paidbah ha kylleng ka jylla. Kane ka dei ka sien kaba nyngkong ba u Myntri Rangbah ka Jylla un buh kum kane ka jingkyrpad.
U Myntri Rangbah ka jylla u la buh ka jingkyrpad ban pynkut noh ia kane ka jingleh kmen Bihu mynta u snem bad ia kane la sakhi kum ka jingai mynsiem lane ban pynshlur ia ka jngwan phai biang jong ka por bad ban ia im kumba ju im paidbah man la ka sngi.
