Shillong, Jymmang 08 : Haduh 15 ngut ki briew kynthup ia saw ngut ki Khynnah bad uwei u shipai, kila iap bad palat 50 ngut kila mynsaw ha ka jingther kuli bad mortar jong ki shipai ka Pakistan ha kiba bun ki jaka ha Jammu & Kashmir, kynthup ka Poonch, Rajouri, Kupwara bad Pulwama, kum ka jubab ia ka Operation Sindoor jong ki shipai India.
Kane ka jingther kuli bad mortar ka Pakistan kala jia hynne ka step phyrngap, kaba wanrah ia ka jingjulor jong bun ki jingtei ki riew paidbah. Ha Poonch, kawei ka skul bad ka Gurudwara ki dei kiba la shah pynjulor, kaba lam sha ka jingsyier bad jingphet shnong jongki nongshongshnong.
Ki shipai Pakistan kila ther sha India kum ka jingpynphai kylliang ia ka Operation Sindoor kaba sdang ha ka step sngi Balang. Kane ka Operation ka dei kaba la shim kum ka jingkput ia kaei kaba jia ha Pahalgam ha kaba haduh 26 ngut ki Tourist Hindu-25 ngut ki nong India bad uwei u nong Nepal, kila shah pyniap ha ka jinghiar thma ki lehnoh ka Pakistan.
Ka India kala pyntip ba ka jingther namding kala long tang ia ki ktem jongki lehnoh kumka kynhun Lashkar-e-Taiba bad ka Jaish-e-Mohammed, haba ban jur ruh ba ym shym la ther namding satia ia kano kano ka jingtei ki shipai. Ha kane ka jingther namding ka India, la pyntip ba haduh 80 ngut ki lehnoh kila iap ha ki 9 tylli ki ktem ba shah hiar thma.
