Shillong, Jymmang 07: Ka jylla Meghalaya hynne ka sngi Balang kala iasnohkti lang bad ka ri hi baroh kawei ha kaban pynlong ia ka Civil Defence Exercise on Air Raid kum ka jingpynkhreh ia ka jingwan hiar thma da ki liengsuin iapom- kaba dei ruh ka sien kaba nyngkong eh ha ka jylla hadien jong ka thma hapdeng ka India bad Pakistan ha u snem 1971.
La pynlong ia kane ka Mock Exercise katkum ka jingbthah jong ka Ministry of Home Affairs (MHA) da ka jingthmu ban khmih bniah ia ka rukom long jong ka jingpynkhreh lypa ka tnad Civil Defence lada wan jia ka jingwan hiar thma ki nongshun da ki liengsuin iapom ne ka mih shisha ka thma.
Ia kane ka Mock Exercise la pynlong da ka Directorate of Civil Defence & Home Guards ha baroh ki 12 tylli ki Districts da kaba phaikhmat eh ha ki 3 tylli ki district kiba kynthup ia ka East Khasi Hills, West Jaintia Hills bad West Garo Hills.
Kane ka jingpynkhreh ka long ruh kaba iahap bha, khamtam haba ki shipai ka ri India kila sdang ia ka Operation Sindoor da kaba ther namding ia ki ktem jong ki lehnoh kiba don ha ri Pakistan bad ha ka Jammu and Kashmir kaba la synshar da ka Pakistan (PoK), kaba ki lehnoh ki ju shong ban pyrkhat bad ban ai ia ki jingbthah na ka bynta ki kam ban thombor pyrshah ia ka ri India.
Kane ka Mock Exercise kala sdang ha ka por 4 baje janmiet, ha kaba ki dkhot jong ka Civil Defence kila sdang ia ki kam naduh na ki shnong ki thaw lyngba ki Civil Defence Warden Services bad local Civil Defence Volunteers bad ha ki district level bad ka District Magistrate kum ka Controller of Civil Defence kiba shimti ban khmih ia ki sienjam ha ryngkat bad ka jingioh jingkyrshan na ki Deputy Controllers Civil Defence, Quick Response Team jong ka Civil Defence & Home Guards, State Disaster Response Force (SDRF), Police, Fire & Emergency Services, District Disaster Management Authority (DDMA) jong baroh ki District.
Ha ka Jylla, ka State Disaster Management Authority (SDMA), ka Air Force Station bad ka 101 Area jong ki shipai kila iashimbynta lang ha ka Civil Defence Exercise, kaba kynthup ia ka jingleh ia ka Search and Rescue na kawei ka iing building kaba la khyllem ha kaba ki Civil Defence Volunteer bad Wardens ryngkat bad ka Quick Response Team jongka Civil Defence & Home Guards, ka jingpluh ding ia kaba ka tnad Fire and Emergency Services bad ka kynhun kaba la pyntbit ryngkat bad ka State Disaster Response Force (SDRF) kila leit ban tem ia kane ka ding.
Ha ka por 6:28 janmiet la pynsawa ia ka siren jong ka Air Raid hajan baroh kawei ka jylla naka bynta 2 minit bad kala don ka jingpynrit bad jingpynheh iaka rukom sawa kaba ai dak ba kala don ka jingwan her ki liengsuin iapom jong ki nongshun. Ha ka por 6:30 thik, jan baroh kawei ka jylla kala dum tliw tliw kum shi bynta jong ka Black Out ne ka jingpynlip ia ka bording elektrik ha ki iing ki sem.
Kane ka Black Out kala neh tang 2 minit bad ha ka por 6:32 janmiet hadien la pynpah biang ia siren kumba shi minit kum ka dak jong ka jingpyntip ba kam don eiei shuh. Da kane la pynkut noh ia ka mock exercise da ka jingjop.
“Ia ka Civil Defence Exercise la pynlong ban khmih bniah ia ka jingpynkhreh jong ka tnad Civil Defence hapoh ka jylla lada wan jia ba ka don ka thma” ong u MK Sangma, Joint Director ka Civil Defence haba iakren bad ki nongthoh khubor hynne ka sngi.
Ula pyntip ba ia ka Civil Defence Exercise on Air Raid la pynlong nyngkong eh ha ka jylla hadien jong u snem 1971. Ual ong ba namar ka jingpyntip kaba mardor, kumta kane kan dang dei tang ka wat kaba nyngkong jong ka civil defence exercise bad hadien habud yn sa pynlong sa ia kiwei kiwei ki Exercise kiba pura.
