Shillong, Jymmang 07 : Arngut ki nongtrei kam monsngewbha kila leit ban mudui sha ka Meghalaya Human Rights Commission (MHRC) pyrshah ia ka jingkynnoh pynsangeh ha kaban pyntreikam ia ka Mahatma Gandhi National Rural Employment Guarantee Scheme (MGNREGS) ha Laitnongkseh, kaba hap hapoh ka Sohiong C&RD mynta la arsnem.
Kine ki nongmudui ki kynthup ia u Enlang Sawian uba dei u Education Secretary ka HYC bad u nongiasaid Ain lem bad u Purningstar Shabong. Kine ki arngut kila kynnoh ba u Block Development Officer (BDO) ka Sohiong Block, u khlem lah ban leh eiei halor kane ka kam.
Kila ong ba ka jingpynsangeh la aidaw namar ka jingmudui ki arngut ki briew kata u Philstar Nongbri bad u Devius Lyngdoh lem bad katto katne ki bym don satia ia ka Job Card, sha ka Ophis u BDO kaba long pyrshah ia ka jingshna ia ka surok iaid kali na surok PWD sha Mawshakad, kat kum ka work order ba 8 tarik Nohprah, 2023 bad 23 tarik Iaiong 2024.
Ka jingsahteng jong ka skhim MGNREGS ha Laitnongkseh kala long ka tyllong ki jingjynjar ia ki trai shnong, khamtam eh ka ktah ia ka kamai jakpoh jong ki nongshongshnong kiba shaniah ha kane ka skhim ban ioh ia ka lad iohkam iohjam.
Kila iathuh “Ka Dorbar Shnong ka Laitnongkseh bad ka Village Employment Council (VEC) kila pyrshang la bunsien ban iakren bad u BDO halor ka jingpynsangeh ia ka skhim. Hynrei u BDO u khlem leh eiei satia lane pyni ia ka jingsngewkhia haba iadei bad ka jingpynsangeh ban pyntrei ia ki skhim ba kongsan ha ka shnong ha kine ki arsnem bala leit noh, kaba ka ktah jur bha ia ki nongshongshnong ka Laitnongkseh”.
Kila kynnoh ba ka jingbym leh eiei na ka Ophis u BDO ka dei kaba sngewkhia bha bad ka pyni ruh ia ka jingbym khein snep ia ka sur jong ki nongshongshnong kiba shah ktah jur da ka jingpynsangeh ia kane ka skhim.
Kine ki arngut kila kyntu ia ka MHRC ba kan tuklar lem bad ban tohkit ia ki daw ha lyndet ka jingbym leh eiei u BDO bad ban pynmih ia ka jingbthah ha kaban pynsdang biang noh mardor ia ki kam ka MGNREGS hapoh ka Shnong.
 pyrshah ia ka jingkynnoh pynsangeh ha kaban pyntreikam ia ka Mahatma Gandhi National Rural Employment Guarantee Scheme (MGNREGS) ha Laitnongkseh, kaba hap hapoh ka Sohiong C&RD mynta la arsnem.){kind=link}