Guwahati, Jymmang 6: Lai ngut ki briew ia kaba la suba jur ba kidei ki nongbeh mrad kila shah kem noh ha ka sngi Nyngkong na Amtenga kaba don hapoh ka jylla Assam jong ka Chirang district halor ka jingkynnoh ba ki pyniap ia u hati khlaw ha Manas National Park.
Ia kine ki lai ngut ki briew kiba la shah kem, la tip kyrteng ia ki kum u Abid Borgoyari, u Mahesh Islary bad u Jiron Basumatary.
Ia kine ki lai ngut la suba jur ba ki lah ban donkti ha kaba iadei ka jingshah pyniap u hati khlaw hapoh ka park kaba don ha shi lynter jong ka khappud India-Bhutan border.
Hadien ka jinglap ia ki lai tylli ki met iap Hati ha Manas National Park ha ka 2tarik u Jymmang, ki pulit ki la pynlong ia ka jingtohkit da kaba kem ia lai ngut ki nongbeh mrad.
Ha ka jingkhynra, ki pulit ki la kurup ar tylli ki suloi ba la shna hi ryngkat bad katto katne ki tiar kiba lah ban ngeit ba ki don jingiadei bad ka kam siat mrad.
Katei ki jingshah pyniap ki hati kala jia hajan ka Palengshi beat, hajan u Pillar No. 194 ha shilynter ka khappud Indo-Bhutan.
Katkum ki kaiphod, ia ki hati la lap ba kila iap najan jong ka border post, bad wei napdeng jong ki la iathuh ba la dep ban khrai khlieh bad ki don shi bun ki bynta jong ka khlieh ki jah bad ia uba lai la lap napoh u pud u sam jong ka Banchum Beat Office.
Na ka liang ki bor ba dei khmih ki dang pynlong ia ka jingtohkit, la kine ki lai ngut ki donkti ne em ha kaba iadei bad ka jingshah pyniap kine ki hati khlaw ne ki ia don bynta lang bad ka kynhun siat mrad kaba kham heh kaba treikam ha sawdong jong kane ka jaka.
