Shillong, Jymmang 06: U Myntri Rangbah ka Jylla u Conrad K. Sangma hynin ka sngi Nyngkong ula leit jurip ia ka jingtei ia ka Tura Medical College bad pynpaw ia ka jingsngewhun halor ka jingiaid jong ka kam.
Ula pyntip ba la shimkhia ban pynthikna ban pyndep ia kane ka jingtei bad ban sdang pyntreikam noh ia ka Medical College ha u snem pule ban wan.
“Kala jan kot sha ka 80 percent ka jingpyndep ia ka jingtei. Ka jingpyniaid shakhmat ia ka kam ka long kaba sngewhun bad ngi don ia ka jingkhmih lynti ba ki bynta kiba kongsan jong ka jingtei ia ka college yn lah ban pyndep noh hapoh jong une u snem” la ong u Myntri Rangbah.
Ula pyntip ba ka sorkar kala khmih bniah man la ka por ha ka jingpyniaid ia ki kam jong ka jingtei ban pynthikna ba yn lah ban pyndep katkum ka por kaba la buh.
“Ngi lah pyrshang kat kaba lah ban ioh sdang kloi noh ia ka jingpule ha Tura Medical College” ula ong.
U Myntri Rangbah ula pyntip ruh ba ka sorkar ka dang wad ia ki lad ki lynti ban ioh ia ka jingiatreilang na ka bynta ban pyniaid bad pyntreikam ia ka medical college bad ula ong katba ka jinglongtrai ia ka college kan neh beit bad ka sorkar.
“Ka Tura Medical College kan ai jingshakri ia ki samla pule ka Meghalaya. Ki seat kiba bun tam yn bhah kyrpang sha ki samla pule ka jylla ban pynthikna ba kin ioh pura ia ka lad ban ioh pule ha ka liang ka koit ka khiah” ula ong.
La tei ia ka Tura Medical College da ka jingmut ban pynkhlain ia ka pule puthi ha kaba iadei bad ka jingai ia ka koit ka khiah ha ka jylla bad ka rukom ai jingsumar ha rilum Garo.
Lah ban kdew ba ka sorkar jylla kala bei tyngka ban kyntiew ia ka koit ka khiah ha ki thain nongkyndong ka jylla, ban pynbha katkum ka juk ba mynta ki hospital sorkar bad ban thungkam ia ki briew kiba la tbit ha ki jaka ai jingusmar.
“Ka jingpynleit jingmut ka jong ngi ka long ban tei ia ka rukom ai jingsumar kaba paka ban pynthikna ba man la ki nongshong shnong kin ioh ia ka jingshakri kaba pura ha ka liang ka koit ka khiah khlem da khein ia ka jinglong jingman jong ki jaka” ula ong.
