Wanrah ia ki stream thymmai ha ki 11 tylli ki skul Higher Secondary
Shillong, Jymmang 01 : Ka Kynhun Myntri ka Sorkar Jylla ha ka sngi Palei kala mynjur ban kyntiew kyrdan noh ia 6 tylli ki skul Secondary ka Sorkar sha ki skul Higher Secondary bad ban wanrah ruh ia ki lain pule thymmai (stream) ha ki 11 tylli ki skul Higher Secondary.
Haba pyntip ia kane sha ki lad pathai khubor, u Myntri bad Nongaiktien ka Sorkar Bah Paul Lyngdoh ula ong “Ha baroh, 6 tylli ki skul Secondary ka Sorkar kin kiew kyrdan noh sha ki Higher Secondary bad 11 tylli ki skul, ki bym pat don ia ki katto katne ki lain pule, kin ioh mynta ia kine ki lain pule.
“Ka jinglut jingsep ka ban ktah ia ka pla tyngka ka Sorkar ban wanrah ia kine ki lain pule thymmai bad ka jingkyntiew kyrdan ia ki skul Sorkar, kan long kumba T.10 klur shisnem” ula bynrap.
U Bah Paul ula iathuh ba ia kane ka rai la shim hadien ba ka don ka jingduna ha ka jingpynrung klas ha ka kyrdan pule klas XI, kaba long tang 12,000 seat bad ruh ka jingbun palat kiba leit pule ha ki skul Higher Secondary khamtam ha ki jaka sor ka ri-lum Khasi bad Jaintia.
“Ka jingkyntiew kyrdan ia kine ki skul kan iarap ban pyndap ia kane ka jingduna da kaba ioh pynrung klas noh mar mar sa 9000 ngut” ong u Bah Paul.
Ki hynriew tylli ki skul ki ban shah kyntiew kyrdan sha ki High Secondary ki long: Rymbai secondary school, Umthlong-Nongthliew secondary school, Nongtalang secondary school, Tirot Sing Memorial secondary school, Laitkynsew, Tura public school bad Jowai public school.
Ha kajuh ka por, u Myntri u pyntip ba ka Sorkar kala mynjur ruh ban wanrah lane bynrap ia ki lain pule thymmai ha ki katto katne ki skul Higher Secondary, ki bym pat don satia ia kine ki lain pule ia mynta.
“Kine kin long ka lain pule saian ha Tirot Sing Memorial Govt Higher Secondary school, Nongkhlaw, ka lain pule commerce ha Govt Boys Higher Secondary School, Tura, Dalu govt secondary school, West Garo Hills, Baghmara Higher Secondary School, Govt Boys’ Higher Secondary School, Jowai bad Sohkha Govt Higher Secondary School. Kine ki skul ia mynta ki don tang ka lain pule arts bad saian bad kin ioh noh ia ka lain pule commerce” ula ong.
“Lain pule Arts, yn wanrah ha Jirang Higher Secondary school, Ri Bhoi, Resubelpara Higher Secondary School, Maharam Higher Secondary School, Mawkyrwat. Ha ka lain pule science bad commerce ngin bynrap ia ka United Kharkutta Govt Higher Secondary School, North Garo Hills, Malangkona Higher Secondary School, ki ban sa ioh noh ia ka lain pule saian” bynrap u Myntri.
