Kyrpad u HM barim ia u CM ban tuklar lem noh ban pynbeit iaki kynrum kynram ka NEHU

Shillong, Jymmang 1: Ka jinglong jingman hapoh ka skul bah North-Eastern Hill University (NEHU) kala pyn sngewkhia ia kiba bun bad kaba la pynlong ruh ia u Myntri ka tnad pule puthi barim jong ka jylla u ba dei ruh u MLA jong ka UDP Bah Lahkmen Rymbui ban kyntu ia u Myntri Rangbah ka jylla u Conrad K. Sangma ba un tuklar bad ban long ksiang ha ka ban iapynbeit hapdeng ki bor khmih ka skul bah bad ka Ministry of Education.

Haba pynpaw ia ka jingsngewkhia halor ka jinglong jingman hapoh kane ka skul bah u Bah Rymbui u la ong, “Ka jingsngewkhia jong nga ka long ba ka NEHU, kumba ka long mynta, ngim tip mano ba peit ïa ka, ha ka jingmyntoi jongno, bad mano ba ïoh jingmyntoi.”

U Bah Lahkmen u la kynthoh ruh ba ka don ka jingduna ha ka jinglong nongialam ha kaba iadei bad ka rukom pyniaid ia ki skulbah, ia kaba la donkam ban pynbeit kyrkieh.

Haba kren halor ka jingdonkam jong ka jaka pule ba kan long kaba suk bas ain, u Bah Lahkmen u la ong, “Kano kano ka jaka pule ka dei ban don ka jingsuk, jingkmen, bad ka jingiadei kaba jan bad ki bor pyniaid jong ka skul bah bad ki samla pule kidei ban don ka jingiadei bad ki nonghikai bad lada ka long kumne, kumta ka jaka pule kan long kaba bha.”
Katkum u Bah Rymbui, ka jingkulmar kaba mih ha NEHU kam dei tang ka kam jong ki bor ba dei peit, hynrei ka dei kaba ktah jur ia ki samla pule bad ia ka nam ka burom jong ka skulbah.

Shuh shuh u Bah Lahkmen u la ong ba ka jingklumar kala don lypa kaba la pynlong ia baroh ki nongia don bynta ba kynthup naduh ki samla pule, ki nongtrei bad kumjuh ruh ki nonghikai ban sah ha ka umdum. “Kumba ka long mynta, ngim tip kaei kaba jia,” bad u la kyntu ban leh kloi ban pynkut noh ia kane ka jingklumar.

“Ka bynta kaba kongsan eh ka long ba, lada don mano mano ban tuklar ia ka bad hooid, ka NEHU kadei ka central university, hynrei kala sdang nangne. U Myntri Rangbah ka jylla u dei ban tuklar bad ka Ministry of Education bad kumjuh ruh bad ki bor ba dei khmih jong ka NEHU ban wad ia ki lad ki lynti ban weng noh ia kane ka jingeh” ong u Bah Lahkmen.