Shillong, Iaiong 25 : U Myntri ka tnat Pule Puthi u Rakkam A Sangma ha ka sngi Thohdieng, u la niew ia ka jingjia shah thombor u nonghikai ka North Eastern Hill University (NEHU) kum ka jingjia kaba ‘sngewsih’. U la pynthikna ba ka ain kan shim ia la ka jong ka lynti.
“Ka long kaba sngewsih haduh katta katta halor katei ka jingjia namar kala jia khamtam ha ka campus jong ka skulbah kaba la paw.Kumta ka ain kan shim la ka jong ka lynti”, ong u Sangma haba kren sha ki nongthoh khubor.
“Nga la iakren bad u SP. Ki dang shim ia ki lad ki lynti ban pynbiang ia ka jingpahara. Ki pulit jong ngi kila shim khia ia kane ka kam”, u la ong.
Katkum ka jingong jong u, ym dei ban ailad ia kum kine ki jingjia ba kin jia biang ha NEHU.
