Guwahati, Iaiong 25: U Myntri Rangbah ka jylla Assam Himanta Biswa Sarma, haba kren sha ki lad pathai khubor ha nongbah Guwahati ha ka sngi Palei, u la pynbna ba u Member of Parliament na ka jylla Assam u la pynlut por haduh 15 sngi ha Islamabad khlem da pyntip sha ka sorkar Assam ne wat sha ka sorkar kmie.
“Ngam shym pat la jer kyrteng, hynrei u wei u nongtrei ba kongsan jong ka party Congress uba dei ruh u MP na Assam, u la sah ha Islamabad kumba 15 sngi khlem da pyntip sha ka sorkar,” ong u Sarma.
Katkum u Myntri Rangbah, u MP u la leit sha Pakistan lyngba u pud u sam jong ka Attari khnang ban lait na ka jingshah ktah ha ka jingleit jingwan da ka liengsuiñ. “U la pyndonkam da ka surok Attari ban rung sha Pakistan.Kane ka kam ka don mynta ha ka jingtohkit da ka kynhun tohkit ba kyrpang Special Investigation Team (SIT)” la ong u Sarma.
Shuh shuh u la kynnoh ba ka kurim jong une u MP kala ioh pdiang ia ka tulop na Pakistan mynta la lai snem, wat lada ba ka trei ha Delh.”Ngi lah ioh pdiang ia ki sabut kiba kongsan bad ia kane la pyntikna da ki nongtrei jong kane ka kynhun kaba ka trei bad ngi la ioh ia ka jingkynthoh bad kiwei de ki kot ki sla ki ban kyrshan,” la kam u Sarma.
U Myntri Rangbah u la ong ba ki pulit ka Assam (SIT) kin ia kren sani bad une u MP bad kumjuh ruh bad kiba ha iing jong u ha u bnai Jylliew ne Naitung ban ioh sngew u ia ki khana jong ki bad hadien ia ka kaiphod yn sa aiti ha u bnai Nailur.
Shuh shuh u Sarma u la kdew ba ka jingleit jong u MP sha Nepal ka don ia u dak jingkylli baheh ha kajuh ka por, “Baroh ki tip ba ka ISI ka trei borbah bha ha Nepal ha kito ki porbad u MP u khlem don kano kano ka jingialang paidbah, hynrei kadei ka jingleit jngoh barieh bad mynta ngi dang pynlong ia ka jingtohkit la ka jingleit sha Pakistan bad Nepal ka don jingiadei ne em lane la ka jong ka jingjia,” ong u Sarma
“Kane ka dei ka kam kaba khia bha kaba ïadei bad ka jingïada ri,” u la ban jur da kaba bynrap ba la khmih lynti ïa ka kaiphod jong ka SIT ha shwa u bnai Nailur.
