Shillong Iaiong 23: U Myntri ka Tnad Jngohkai ka jylla u Bah Paul Lyngdoh hynne ka sngi Balang ula ong ba ka sorkar jylla ka ai ia ka jingkyrshan kaba pura ia ka sorkar pdeng kaba pyrshang ban tehlakam ia ki kynhun kaikhlaw bad ia ki kam pyntriem jong ki hapoh ka jylla Jammu & Kashmir.
U Bah Paul Lyngdoh ula ong, ba ka jingthombor bad jingshim ia ka jingim jong ki nongjngohkai kiba leitkai sha jaka jngohkai kaba itynnad ha Pahalgam, kadei ka jingleh ka bym don shuh ia ka mynsiem iatip lem.
“Kane kadei ka jingleh kaba shyrkhei ia ki para briew ia kaba ym lah ban mutdur bad ka jingthombor ia ki nongjngohkai kiba noh synniang sha ka jingioh khajna ka jylla ka long kaei kaei kaba la leh palat pud ia kaba ngam lah sngewthuh shuh” ula ong.
“Ngi ieng ryngkat bad ka ri bad ngi ai ka jingkyrshan kaba pura ia ka sorkar pdeng ha ka jingpyrshang ka jongka ban tehlakam ia ka jingkiew jong ki kam lehnoh bad ki kam iaumsnam ha katei ka jaka” ula ong.
U Bah Paul Lyngdoh ula ong, ba ka sorkar jylla kala nang pynkhlain bad kala don ruh ia ka jingiakren kaba khah khah bad ki BSF ban pynthikna ia ka jingshngain jong ki paidbah bad ula iathuh ruh ba dang shen ula iakynduh ia u DGP ka BSF.
“Ngin iaid shakhmat ha kaban thung kam noh ha ka kam pulit. Kumba phi tip kila don kumba 3000 tylli ki kam kiba lait kiba yn sa thungkam noh bad haba don kino kino ki jaka kiba don ki jingduna ha kaban ai jingshngain ia ki nongshong shnong ka jylla, ngi iatreilang bad ki bor pulit jong ka sorkar pdeng bad khamtam eh bad ki BSF kiba don bun bha hapoh ka jylla Meghalaya” ula ong.
