Kyrpad ka NPP-Farmers Front ia ka Sorkar ban pynkhlain ialap ia ka CM ASSURE sha ki nongrep

Kwah pynheh ia ka dor u synsar bad shimkhia ia jingbamkhniang u diengkwai

Shillong, Iaiong 23 : Ka Farmers’ Front jong ka National People’s Party (NPP) ha ka sngi Balang kala rai ban kyrpad ia ka Sorkar Jylla ba kan pynkiew noh ia ka dor u synsar, ban leh eiei halor ka jingbamkhniang ki shylliut diengkwai bad ban pynkhlain ruh ia ka jingialap sha ki nongrep halor ka CM ASSURE scheme.

Haba kren sha ki lad pathai khubor hadien ka jingialang, u Nongaiktien ka NPP Bah Himalaya Shangpliang ula ong “Ka dor u synsar kala hiar bha bak ly bak. Kumba ngi sngewthuh na ki Nongrep ba ka dor bala buh da ka Sorkar ka long kaba rit palat bad kumta, ha ka jingialang mynta ka sngi ngi la rai ban leit iakren ia ka Sorkar ba kan pyrkhat biang ia ka dor jong u synsar bad lada lah, ban pynheh noh ia ka dor. Ka dor jong u synsar Grade-I la buh T.55 shi kilo, Grade-II ha ka dor T.40 bad Grade-III ha ka dor T.30 shi kilo”.

“Nalor kane, ngi la rai ruh ba ka bhah ba 800 na ka shi kilo ba ju buh na ka bynta u synsar ruh dei ban pynheh noh palat ia ka 1000 kg. Balei? Namar ki don ki nongrep synshar, kiba rep bad pynmih palat ia ak 2000-3000 kg. Ia ki lada ki ong ba u pud u long tang 800kg, ka jingkylli ka long ba kin leh aiu ia u synsar uba sah. Namar kata, ngin sa leit iakren ia ka Sorkar bad ia ka Tnad Agriculture ba kan shong pyrkhat bad bishar biang lada lah ban leh eiei ia kane” ula bynrap.

U Bah Himalaya ula ong ruh ba ka NPP Farmers’ Front kala rai ruh ban kyrpad ia ka Tnad Agriculture bad Horticulture ba kin shimkhia mar mar ha kaban tehlakam ia ka jingpur jong ka jingpang bamkhniang ki shylliut diengkwai bad ban ai jingiarap ruh ia ki nongrep kwai.

“Kumba long mynta, ka jingbam khniang ki shylliut diengkwai kam pat duna satia. Ka jingbam khniang kala nang roi. Bad mynta ka sngi, ki Nongrap, kiba la wan na West Khasi Hills bad South West Khasi Hills, kila pyntip ba ki dang don bun ki jingjia ba bam khniang, kiba pyniap tram ia u diengkwai” ula ong haba bynrap “Ngi sngewthuh ba ka don ka CM ASSURE scheme bala ai sha ki nongrep kwai. Ngin sa leit ialap sha ki nongrep kwai khnang ba kin lah ban ioh ia kane ka skhim. Ngi kyrpad ruh ia ka Tnad ban wad bniah ia ki daw jong kane ka jingpang. Balei ba ym lah tehlakam ia kane ka jingpang namar kala nang pur na kawei ka District sha kawei pat”.

Haba ban jur ia ka jingkongsan ka CM ASSURE scheme, u Bah Himalaya ula ong ba kala don ka jingslem ha ka jingpynrung kyrteng ia ki nongrep hapoh kane ka skhim bad ka Party (NPP)kalarai ban kyrpad ia ki borkhmih ha ka Tnad Agriculture bad Horticulture ba kin sngewbha ban pynsted noh ia ka jingpynrung kyrteng. Ia kane ka jingpynrung kyrteng la iarap da ki katto katne ki volunteer ha ki Block. Mynta, kine ki Volunteer dalade kim da tip bha shaphang ka skhim bad kumta, donkam ban pynshai bha ha ki Block ne ha ki shnong ki thaw lane sha ki Volunteer.

Halor ka jingdonkam ban pynkhlain ia ka jingialap sha ki nongrep halor kane ka skhim, une u Nongialam ka NPP ula ong “Bun na ki nongrep kim pat tip ia kane ka skhim. Kane ka dei namar ki don ruh kiwei ki bor bad ki daw kiba pynlong ia ki nongrep ban sngew sheptieng ban shim ia kane ka skhim ba lehse phi lah ban nym ioh ia ka pisa ha ka pork aba biang hynrei kam long satia kumta. Ngi la kren shai bha sha ki nongrep ba shisien ba ki nongrep kila pynrung kyrteng, ia ka pisa la pyllait mar mar”.

Kat haduh ka 21 tarik Iaiong, haduh 5657 ngut ki nongrep kila pynrung kyrteng ialade hapoh ka CM ASSURE scheme.

“Na kine, tang 4182 ngut ki nongrep kila ioh jingmynjur kaba mut tang kine ki nongrep kila ioh ia ka pisa bad ka pisa bala pyllait kat haduh ka 21 tarik Iaiong kala kot T.5.82 klur. Kumta, ka NPP Farmers Front kala rai ba ki dkhot kin leit sha ki shnong ki thaw bad iakynduh ia ki nongrep nalor ban ai jingpynshai sha ki ba kin shim ia kane ka skhim” ula bynrap.

Nalor kane, ka NPP Farmer’s Front kala pyntip ruh ba kan sa sam shen ia ka sboh ba palat 500 metric ton sha ki nongrep.

U Bah Himalaya haba iaroh ia ki sienjam bala shim da u Symbud Myntri Rangbah Bah Prestone Tynsong halor kane ka kam, ula ong “ Ngi sngewthuh ba ka sboh kila sahkut ha Dibrugarh namar ka indent order kam dei kaba la ai da ka Sorkar Jylla hynrei da ka jingtuklar jong u DyCM, ki kam kila sdang biang bad ki sboh kila poi ha Khanapara bad kawei ka kam kaba sah bad ngi ka long ban ioh ia ka jingmang na ka Tnad.

U Bah Himalaya ula iathuh ba ka sboh kam shym la poi sha ki nongrep naduh u bnai Rymphang-kaba la pynsngewkhia bha ia ki nongrep, kiba ju mlien ban rep da ka jingiarap jong ka sboh.

Ha kajuh ka por, ka NPP Farmers’ Front kala thung ia ki District President ha Ri-lum Khasi, Jaintia bad Ri-Bhoi District bad la aipor ia ki shibnai ba kin thaw ia ki District bad ki Block Committee.