Shillong, Iaiong 21 : Palat 2000 tylli ki skul SSA napdeng ki 3000 tylli, kiba pyniaid da ki Shnong, kila ai ia ka No-Objection Certificate ban aiti noh ia ka bor pyniaid sha ka Tnad Education ka Sorkar.
Ia kane la pyntip da u President ka Meghalaya SSA School Association Bah Aristotle C Rymbai hadien ka jingialang bala pyniaid da u Commissioner & Secretary ba khmih ia ka Tnad Education Vijay Kumar Mantri lem bad ki DSEO, SDSEO bad lai tylli ki Seng Nonghikai ba kynthup All Meghalaya SSA School Teachers’ Association (AMSSASTA) bad ka Meghalaya Fourth Teachers’ Association (MFTA).
“Mynta ka sngi, u Commissioner & Secretary ula ai ia ka jingkhein ba iadei bad ka jingioh lum ia ki NoC na ki skul Shnong halor ka jinglong ba kloi jong ki ban aiti noh ia ka bor pyniaid na ka SSA sha ka Tnad Education. Na ki 3000 tam ki skul shnong ha Jylla, kila ioh pdiang haduh 2000 tam ki NoC” ong u Bah Aristotle haba iakren bad ki nongthoh khubor.
“23 tylli ki skul shimet na East Khasi Hills kila aiti ia ka NoC ba kloi ban aiti noh ia ka bor pyniaid na ka SSA sha ka Tnad Education” ula bynrap.
U Bah Aristotle ula pyntip ruh ba ka jingialang kala iakren bniah ruh halor ka jingbym long ryntih ha ka jingai ia ka jingpynbna sha ki SMC ba iadei bad ka jingai NoC ba ki kloi ban aiti noh ia ka bor pyniaid sha ka Tnad Education.
“Hadien ka jingiakrne kaba sani bha, ngi la iashim rai lang ba kin sa ai biang ia ka jingpyntip sha baroh ki SMC ki bym pat shym la ai NoC ha ryngkat ka jingpynshai kaba shai bha halor kane ka sienjam bala shim da ka Tnad Education ban pan ia ka jinglong kloi jong ki banaiti ia ka bor pyniaid sha ka Tnad” ula ong.
Nalor kane, u Bah Aristotle ula pyntip ruh ba ka jingialang kala iakren ruh halor ka jingpynbeit ryntih ia ki Nonghikai SSA bad ka Sorkar.
“Naduh u Naiwieng 2024, ngi la iakren ia kane ka mat bad ka Tnad Education bad kala iaid la jan hynriew bnai mynta bad hynne ka sngi hadien ba ngi la iakren sani bha, ngi la shim ia ka rai ba hashuwa ban kut u Jymmang, dei ban pyndep noh ia baroh ki kam ki jam ban pynbeit ryntih ia ki nonghikai” ula ong.
“Ngi la rai ba kane ka jingpynbeit ryntih yn leh ha ki lai bynta” ula bynrap.
