Shillong, Iaiong 17: Da ki spah ngut ki nongshad kynthei bad shynrang hynne ka sngi Palei kila iashimbynta ha ka ‘Shad Lyngdoh’ kaba la pynlong da ka Dorbar Raid Wahkhen Khyrim Syiemship ha Madan Shad ha Wahkhen.
Hashwa ban sdang ia kane ka shad la pynlong shwa ia ka lehniam lehrukom da ki ‘Saw Tymmen’ bad hadien ba la pyndep ia kane, ki nongshad kila iashimbynta ha kaban shad ha ryngkat hala ka riam tynrai kaba la pyniphuh iphieng ia kane ka shad kaba la leh naduh ki por kiba mynshwa.
U Sordar ka Raid Wahkhen u Bah Jansing M Tynsong ula ong ba ia ka Shad Lyngdoh la pynlong ha ka aiom Pyrem kaba dei ka aiom Kynther-Laiaw, ka aiom Sei-Lalieng kaba dei ruh ka aiom bet aiom thung ia ki jhur ki jhep, ki soh ki pai, ki syntiew ki skud, ki dieng ki siej bad la pynlong ia ka shad ha ka sngi Iew Shyllong ynda la dep ia ka nguh ka dem ha ka Duwan Mawlyngdoh Lum Lawlyngdoh ha ka jaka kaba don marjan bad ka Wahduid kaba la tip kum ka Umthli bad dei ban pyndep ha ka sngi Rynghep.
Ula ong, ba ha ka Shad Lyngdoh la iashimbynta da ki thei sotti bad ki rangkynsai kiba la shad da kaba bud ryntih ia ki sur jingsawa kiba mih na ki jingtem jingput.
Ula iathuh ba shwa ban pynlong ia kane ka shad, lai sngi shwa kane la pynlong ia ka lehniam lehrukom bad ia kane ka nguh Blei dem Blei la ialam da ki ‘Saw Tymmen’.
“Kane ka lehniam kadei ban ainguh ia u Blei nongbuh nongthaw halor ki jingkyrkhu kiba ula theh sei ha baroh shi snem lyngba ka kheit ka ot bad ka peh ka tai bad la nguh la dem ruh hashwa ban sdang ia ka bet, ka thung ka tep khnang ba u Blei un iai kyrkhu ia kane ka snem” la ong u Bah Jansing bad ka iathuh ba la kyrpad ruh ia u Blei, ba kin ia roi parum pareh ryngkat bad ka burom ka akor, ka koit ka khiah, ka jingnang jingstad bad kumta ter ter.
Ha kane ka Shad Lyngdoh, la wan ban sakhi lang da u Symbud Myntri Rangbah ka jylla u Bah Prestone Tynsong, u Syiem ka Hima Khyrim u Paiem Balajied Sing Syiem, u Secretary ka Shad Lyngdoh Raid Wahkhen u Bah Teken Khongwet bad ki paidbah na kylleng ki jaka.
Haba iakren bad u Symbud Myntri Rangbah ka jylla u Bah Prestone Tynsong uba dei ruh u MLA ka thain, ula pynpaw ia ka jingsngew sarong ia ka jinglah ka Raid Wahkhen ban iai bteng ban pynneh pynsah bad ban pynlong ia ka Shad Lyngdoh kaba dei ka shad tynrai kaba ju pynlong shisien ha ka shisnem.
U Bah Prestone ula pynpaw ruh ia ka jingsngewkhia ba katba nang iaid ki snem ki nongshad kila nang bun hynrei ka jaka shad pat ka long kaba rit bad ula ong, hadien 5-6 snem lada mih bun palat ki nongshad kan long kaba eh ban pynlong ia kane ka shad ha kane ka madan kaba mynta.
Ula iathuh ba ula iakren bad u Sordar ka Raid Wahkhen ba kin wad ia kawei pat ka jaka kaba kham heh bad kum u MLA ka thain yn shimkhia ban tei ia ka jaka shad kaba thymmai, khamtam haba kane ka shad kala khring ym tang ia ki paidbah na kylleng ki jaka hynrei wat ia ki nongjngohkai kiba la wan khnang ban peit ia kane ka shad tynrai kaba la leh naduh ki por mynshwa.
