Shillong, Iaiong 17 : Ka District Magistrate ka East Khasi Hills kala pynjari ia ka kyndon 163 BNSS ba mana ban pyniap pathar ia ki wah bad pynjot ia ka mariang hapoh ka Wah Umiam, kaba hap hapoh u pud u sam ka shnong Umlyngka.
La ong ba ka jingmana kan long naduh ka Sdad Wah Umkhrah haduh Sdad Jlu. Ka jingmana ka kyntnup ia ka jingpyndonkam ia ki dawai bih, ki jingpynbthei bomb, ka jingber bleaching powder, dawai khniang, dynamite, ker jar bad kiwei kiwei.
Ia kane ka hukum la pynjari hadien ka jingioh khubor ba ki don ki riew runar kiba la pyniap pathar ia ki dohkha ha ka Wah Umiam kaba hap hapoh u pud u sam ka shnong Umlyngka.
Ka ong ba kino kino kiba pynkhein ia kane ka hukum kin sa pynngat ha ka jingpynsajia kat kum ka kyndon 223 jong ka BNS.
Kane ka hukum kan treikam noh mardor bad kan treikam tad haduh da pynmih da kawei pat ka hukum.
