Kyntu ka Sorkar ia ki Nongkhaii ban pyntip sha ki Pulit ba lum pisa beain ki kynhun Sengbhalang

Shillong, Iaiong 16 : U Symbud Myntri Rangbah ka Jylla ba khmih ia ka kam Pohiing (Police) Bah Prestone Tynsong, ula kyntu ia ki Nongkhaii ha Iewduh bad kiwei kiwei ki jaka iew ha Jylla, ba kin pyntip sha ki Pulit lada don ki kynhun Seng bhalang kiba wan dawa pisa ne lum khajna be-ain.

U Bah Prestone ula kular ba ka Sorkar Jylla kan leh da kaba tyngeh ia kine ki kynhun Sengbhalang bad kan nym ailad satia ba kane ka kam be-ain kan dang iai bteng namar kane ka ktah ia ka iap ka im u paidbah.

Dang shen, Ka Shlem kala ioh lum ia ka thup ki receipt slip jong ki 12 tylli ki Sengbhalang kiba lum khajna beain/dawa pisa jubor na ki nongkhaii ha Iewduh-kaba pynbor ia ki nongkhaii ban pynkiew ia ka dor jong ki mar ki mata ban khyllie trai ia ka jingduhnong na ki riew paidbah.

Haba iakren bad ki nongthoh khubor, u Bah Prestone la ong “Haba iadei bad kane ka slip dawa pisa, ka ain kala don. Nga la dep bthah ia ki bor District kynthup ia u Superintendent of Police ba kin leit iakren ia baroh ki nongkhaii-ym tang ha Iewduh hynrei ha baroh kawei ka Jylla”.

“Lada ki don ka jingsngew sheptieng ia ki jingdawa noh synniang lane ba pynbor ban siew pisa, kim dei ban artatien ban pyntip sha ki Pulit ha kano kano ka por” ula ong.
U Symbud Myntri Rangbah ula ban jur ba ki Pulit kin shim iaki sienjam ba mardor lada don ba pyntip ia kane ka jinglum pisa beain ki Sengbhalang.

“Kane ka long ka jingkyrpad jong nga ia baroh-Sngewbha wat ym artatien. Wat ym don ia ka jingsngew bym shaniah. Phi lah ban shu khot iangi lane lyngba ka phone. Ngi la don ia u Emergency number kaba phi lah ban ioh iakren ia ngi ha kano kano ka por bad ngin shimkhia mardor ia ka kam” ula bynrap.

Ha kajuh ka por, u Superintendent of Police ka East Khasi Hills Bah Vivek Syiem ha ka sngi Ba-ar, ula kyntu ia ki nongkhaii bad nongshong dukan ba kin wan shakhmat ban pyntip ia kano kano ka jingwan lum pisa ne dawa pisa beain. Ula pynshai ba kum kine ki kam ki dei kiba beain bad ym dei ban khmih ia ki kum ki jingai synniang sngewbha.

U Bah Vivek ula kubur ia ka jingsheptieng jong ki nongkhaii bad kular ba ki Pulit kin buhrieh ia ki kyrteng ia kito kiba ai ia ki jingtip. Ula pynshlur ia ki ba kin shu ai jingtip sha ki Pulit haba iadei bad ka por bad ka jaka ba jia kum kine ki jingjia lada kim kwah ban ujor ia ka ejahar.

Na kine ki 12 tylli ki kynhun Sengbhalang ba lum pisa ha Iewduh, tang saw tylli ki dei kiba la paw ha ka thain bad kine ki dei ka Hynniewtrep National Youth Front (HNYF), ka Hynniewtrep National Youth Movement (HNYM), ka Poor Peoples’ Movement (PPL) bad ka Hynniewtrep Achik National Movement (HANM).

Katba phra tylli pat ki dei ki Sengbhalang ki bym ju iohsngew kyrteng satia mynno mynno ruh bad lehse kine ki dei tang ki kynhun shim kabu, kiba shim kabu ia ka jingsheptieng ki nongkhaii bar jylla da kaba pynbud tynneng bad shim nuksa ia kaei kaba leh da kiwei pat ki kynhun Sengbhalang kiba paw ka Jylla.

Kine ki kynhun sengbhalang (bym ju bna) ki dei : ka Ki Khlur u Hynniewtrep (KUP), Hynniewtrep North Federation (HNY), Hynniewtrep People Define Alliance (HPDA), Hynniewtrep Khasi People Movement (HKPM), Hynniewtrep People Youth Organisation (HPYO), ka Hynniewtrep National Youth Council (HNYC), ka Hynniewtrep Youth Federation (HYF) bad ka United Khasi Council (UKC).