Shillong, Iaiong 15 : Haduh 80 percent ki nongioh jingmyntoi na ka Meghalaya Health Insurance Scheme (MHIS) kila pyndep ban pyniasoh ia u Aadhaar.
Haba pyntip ia kane ha ka sngi Ba-ar, ka Myntri ka Koit ka Khiah kong Ampareen Lyngdoh kala ong “Ngi la bun bha ki briew bala register ha ka MHIS. Ka sien ba khatduh ba nga shong bishar kam bad ki Ophisar, ka jingpynrung kyrteng ha ka MHIS kala kot ia ka 80%. Ha nga kane ka dei kaba la heh hynrei ym baroh kila pyniasoh Aadhaar. Ka jingeh kan mih haba ki iohpang jur”.
Haba pynpaw ba ka jingpyniasoh Aadhar ka long kaba kongsan ban ioh ia kine ki skhim, ka Myntri kala ong “Ngi kyrpad ia ki nongshongshnong ba kito na phi kiba kwah ban ioh jingmyntoi na ka skhim MHIS jong ka Sorkar Meghalaya, sngewbha pyniasoh noh bad u Aadhaar khnang ba ha ka por ba ki donkam ia ka jingtuklar ka Sorkar, kan long kaba la khreh bad ba lah ban ioh ba phin pyndonkam”.
Ka Myntri kala pyntip ba ka Sorkar kala shim ia ki sienjam ban pynbun ia ka jingpyniasoh Aadhaar bad ong “Man ki jaka sumar ha Jylla kin don ia ki lad pyniasoh ia u Aadhaar. Ngi la iatreilang bad baroh ki tnad ba dei khmih,ki Block, ki Ophis ki DC ban pynthikna ba ki nongshongshnong ki lah ban pynrung kyrteng ialade bad ka MHIS scheme jong ka Sorkar Meghalaya”.
“Na kaei kaba ngi iohi kala don ka jingiabeh jong ki briew hynrei sngewsih ba katto katne na ki nongshongshnong kila hap ban buria nala ka jong ka pla haba ki shitom jur naba kim shym pat pyniasoh ia u Aadhaar” kala ong.
“Mynta, lada ki nongshongshnong ki kem pang bad shitom jur, ngi la pyrshang katba lah ban pyniasoh ia u Aadhaar jong ki watla ki don ha ki hospital” kala bynrap.
