Guwahati, Iaiong 13: Ka jingiakhih pyrshah ia ka Waqf Amendment Act ka la pynmih ia ka jingkulmar ha kylleng ka thain Silchar, kynthup ha Chamragudam, Berenga bad Lakhipur.
Kane kala pynlong iaki pulit ban tied daki lathi ban pynpra ia ki paidbah ba iakhih.
Kane ka jingïakhih daka ba iaid paidbah ka la sdang na Berenga ha ka step Sngi U Blei.
Haba sdang ka jingiaid paidbah, la sakhi ba ka long kaba jai jai hynrei la don pat ki riew shim kabu kiba la sdang kawang maw kaba la pynlong iaki Pulit ban tied daki lathi ban pynpra iaki nongiakhih.
Ki nongiakhih kila rah da ki placard bad pyrta pynrem daka ba kynnoh ba ka Act ka long “pyrshah ia ka niam Islam” bad ki la byrngem ban pynjur ia ka jingiakhih jong ki lada ym weng noh ia katei ka ain.
Wat hapdeng bun tylli ki jingkhang pulit kiba don ha shilynter ka surok Old Lakhipur Road, Water Works Road, Kalibari Road bad Fatak Bazar ki paidbah kila tur beit naphang kaba la pynlong ka jingiakynad bad ki Pulit.
U SP jong ka Cachar, u Numal Mahatta, Additional SP Subrata Sen, bad kiwei kiwei ki heh pulit, ki la poi sha Kalibari Point-ka jaka kynduh ba bun briew jong ka Janiganj, Sadar Thana Road, bad Dewanjee Bazar- ban khang lad ia ka jingiaid ki nongiakhih.
La sakhi ba ki bor district kila wanrah ruh daka kynhun shipai Commando ban tehlakam ia ka jingkulmar.
“Ngi la pynlong ia ka jingialang paidbah kaba jai jai ban pyrshah ia ka Waqf Amendment Act ha Silchar. Ngi pyrshah pura ia katei ka ain namar ba ka long kaba ‘pyrshah ia ka niam Islam’. Ngi la pynrem ia ka jingjia kawang maw. Ngim pyrshah ia ki pulit, kito kiba kawang maw ia ki pulit kin ym lait. Lada ki pulit kin shim sienjam iaki ba kawang maw, ngin kmen bha” la ong uba iakhih.
Haba kren sha ki lad pathai khubor, u SP ka Cachar, u Numal Mahatta u la ong, “Ngi la pyndonkam da ka bor kaba biang ban pynpra iaki ba iakhih. Ha kaba nyngkong ka jingialang ka long kaba suk hynrei ki don ki nong shim kabu kiba la pyrshang ban thaw ia ka jingkulmar. Hynrei ngi la lah ban tehlakam”.
“Kumba 300-400 ngut ki briew ki la ia lum ban pyrshah ia ka Waqf Amendment Act. Baroh ki nongshim kabu kiba pyrshang ban pynthut ia ka jingsuk kin shah pynngat ha ka ain”.
