“Ngam treh ban iakren pynbeit shabar ka Iingkashari” ong u Timothy
Shillong, Iaiong 11 : U Deputy Speaker ka Iingdorbar Thaw Ain ka Jylla Timothy D Shira ha ka sngi Thohdieng, ula leit mih hakhmat ka Iingkashari u Chief Judicial Magistrate, Shillong bad ai ia ki sakhi/jingbatai (statement) ban shong bishar ia ka mukotduma ba u mudui pyrshah ia arngut ki nongleh YouTube.
Ha kane ka mukotduma, u Dy Speaker ula dawa ia ka bai mynrain khmat ba mar T.100 klur na kine ki arngut ki nongleh khubor YouTube namar ka jingpynsaphriang ia ki jingtip ba bakla haba iadei bad ka jingai jingkren jong u hapoh ka Iingdorbar Thaw Ain ba iadei bad ka jingpynlong ia ka Tura kum ka Winter Capital ka Jylla.
Haba kren sha ki nongthoh khubor, u Nongiasaid Ain Sujit Dey ula ong “Mynta ka sngi, u Dy Speaker ula ai ia ki jingbatai/sakhi hapoh ka kyndon 323 jong ka BNSS bad ia kine ki jingkren jong u la buh jingthoh bad ka Iingkashari kan sa shong bishar ia ka”.
“Ka dei ka mukotduma kam bymman (criminal proceeding), ia ki jingbatai /sakhi jong u yn sa shong bishar bad ka Iingkashari kan sa pynmih ia ka hukum lada ka sngewhun ba ka don ka jingpynjah burom ia u briew jong nga” ula bynrap.
U Dey ula ong “Ki don artylli ki mukotduma (bala mudui da u Dy Speaker)- kawei ka kam bymman bad kawei ka civil. Mynta ka sngi, ngi la iakren ia ka mukotduma kam bymman.
Hashuwa kane, ka dei ka mukotduma civil ha kaba ngi la kami a ka bailutksan namar ka jingpynjah burom ia u briew (Dy Speaker) jong nga. Ha kane ka civil defamation, ngi la dawa mar T.100 klur na kine ki nongshah mudui”.
Haba kylli la ka don ka lad ban pynbeit ne iakren sngewthuh jingmut ia kane ka kam shabar ka Iingkashari, u Dy Speaker ula ong ba kan nym don shuh ka jingiapynbeit ne iakren sngewthuh jingmut naba kine ki arngut ki nongleh social media kim shym la pyni ia ka jingbabe ne ka jingbakla ia kaei kaba kila leh.
“Ki (nongleh social media) kim don satia ia ka jingbabe ne ka jingsngew ba ki leh bakla.
Kumno ngin iakren pynbeit ia ka?. Kan nym don satia ka jingiakren pynbeit. Kala pynthohbria ia ka longryngieng jong nga haduh katta katta bad nga hap ban pyrkhar arsien-laisien ban wan sha ka jingiakren sngewthuh jingmut” ula kren shai.
Nalor kane, u Dey ula ong “Ym tang ba kila pynjah burom ia u briew (Dy Speaker) jong nga hynrei kala pynthohbria wat ia ka iing ka sem jong u baroh kawei”.
“Mano manor uh ki don ia ka hok ba pynpaw ia ka jingsngew jong ki ha kino kino ki kam kiba mih ha ki rynsan social media hynrei kam dei pat ban pynmong ne pynjah burom iano iano ruh. Ki lah ban ong kumno kumno ruh hynrei ym ban pynjah buroa” ula ong.
 ban shong bishar ia ka mukotduma ba u mudui pyrshah ia arngut ki nongleh YouTube.){kind=link}