Itanagar, Iaiong 10: U Myntri Rangbah ka Jylla Arunachal Pradesh u Pema Khandu u pynshlur ïa ki kompani pynmih bor ding kiba la pyntrei lypa iaki Project hapoh ka Jylla ba kin pyntrei lang ïa ki projek pynmih bording kiba kham rit ban lah pyndap ïa ka jingdonkam bor ding hapoh ka jylla.
Haba pynïaid iaka jingïalang ‘Steering Committee jong ka Hydropower Development’ u Pema u la kdew ba ki wahduid jong ki san tylli ki wah bah jong ka Jylla ki don ka jinglah ban pynmih bording haduh 100 haduh 300 MW.
U Pema u la ai jingmut ba ki Central Public Sector Undertakings (CPSU) kiba trei ha ki projek kiba heh ki lah ban pyniar ia ka jingtreikam jong ki da kaba pynroi daki projct ba kham rit.
“Namar ba phi la don lypa ki briew bad ki mashin ha ki jaka trei, kam dei ban long ka kam kaba eh” u la ong.
Ha ka jingbishar bniah ïa ki 13 tylli ki projek pynmih bor ding kynthup ha Shi Yomi, Dibang Valley, Anjaw, Subansiri, Kamle u Myntri Rangbah u la pynpaw ïa ka jingkmen halor ka jingïaid shaphrang, da kaba ban jur ïa ka jingdonkam ban ïatreilang hapdeng baroh ki nongshim bynta.
U la kyntu ïa ki CPSU ban bud ryntih ïa ki por ba la buh jong ki projek, da kaba pynpaw ba ka jingpynslem ka pynlut ïa ka Jylla haduh T.9 klur ha ka shisngi ha ka jingduh khajna naka Local Area Development Fund.
U Pema Khandu u la ban jur ruh ïa ka bynta ba kongsan jong ka Power Grid Corporation of India Ltd. (PGCIL) ban pynthikna ïa ka jingpynpoi bording ha ka por kaba biang. “Ka Power Grid ka donkam ban ïatreilang bad ki nongpynmih bording khnang ba ka jingpynpoi bording kan sdang naduh ka sngi kaba nyngkong” u la ong.
Haba pynpaw ïa ka jingdonkam jong ka jingïatreilang hapdeng ka Sorkar Jylla bad ki CPSU, u Myntri Rangbah u la ai khublei ïa ka jingaiti bad ka jingïatreilang jong baroh ki nong iashim bynta.
Ha kane ka jingialang, la iadon lang u Symbud Myntri Rangbah ka jylla u Chowna Mein, u Chief Secretary Manish Kumar Gupta, Advisor H.K. Paliwal, ki Deputy Commissioners bad ki nongmihkhmat naki CPSU kynthup NHPC, SJVN, NEEPCO bad THDCIL.
La bthah ia ki Deputy Commissioner ba kin pynsted ia ka jingshim jaka da ka jingsngewkhia bad ka jingiatreilang bad ki paidbah.
Ha kane ka sngi la iasoi ia ki MoU bad saw tylli ki PSU ban ai jinghikai ia ki nongtrei jong ka tnat Hydro Power Development.
U Myntri Rangbah u la aiti ïa ka song pisa kaba T.269.97 klur sha u Deputy Commissioner jong ka Dibang Valley na ka bynta ka SJVN Ltd ha kaba u la pynpaw ia ka jingsngewnguh ia ka jaitbynriew Mishmi na ka bynta ka jingkyrshan jong ki.
