Shillong, Iaiong 08 : U Myntri Rangbah ka Jylla Conrad K Sangma ha ka sngi Ba-ar, ula ong ba ka Sorkar Pdeng ka dang iakren bad ka Sorkar Pdeng ban pynbeit noh mardor ia ki kynrum kynram ban pynthikna ia ka jingtreikam ba iaid beit iaid ryntih hapoh ka skulbah North Eastern Hill University (NEHU).
“Nga dang iakren bad ka Sorkar India. Nga dang iakren bad u Myntri ka Ministry of Education man ka por bad pyntip sha u ia kaei kaba jia haba kyrpad ruh ban wad ia ki lad ki lynti ban pynbeit noh ia ka. Kila pyrshang kat kaba lah ban leh eiei bad nga la kyrpad biang ia baroh ba hooid ki lah ban don ki jingeh hangne hangtai hynrei ngi donkam ban iatreilang ha kaban pynbeit ia kane na ka bynta ka jingbha ki samla pule” ong u Conrad haba iakren bad ki nongthoh khubor.
Halor ka jingiai bteng ban iakhih pyrshah ia u Vice Chancellor ka University, u Myntri Rangbah ula ong “Ngi sngewkhia halor kiei kiba jia ha NEHU bad khamtam eh nga khuslai eh ia ki samla pule. Ki don ki jingeh na baroh arliang. Ngi la pyrshang ban sngewthuh ia kine ki jingeh, pyrshang ban iakren ia ki kynhun bapher bapher la ka dei beit beit bad nga lane ki briew kiba don ha ka Sorkar bad ngi pyrshang ban peit kumno ngin lah ban pynbeit ia kane ka kam khnang ba ka NEHU kan lah ban treikam khlem ki jingthut”.
“Ka NEHU ka dei ka tnad treikam ba laitluid bad kaba treikam hapoh ka jingkhmih ka Education Ministry. Kumta, baroh kine ki jingeh ki don ha kaba ka Sorkar ka shem jingeh ban tuklar bad hap ban iaid da ka lynti. Ngi sngewkhia bha. Ngim shym la tuklar dalade ia kane ka kam hynrei ngi la iakren. Ngi hap iakren ia ki briew”.
Ula ong ruh “Nga la leit shimet ban iakynduh ia ki samla pule bad don katto katne ngut ki shim da kumwei haba ga ong ba nga khlem wan kum u CM hynrei nga kwah ban iadonlang bad ki, nga wan kum u nongialam, kum u nongshong shnong bad u briew uba kwah ban iarap. Ngam lah ban leit hangtei na ka liang ka Sorkar namar shisha ngim don ia ka bor ban tuklar ia ka jingtreikam ba man ka sngi jong kane ka jaka pule. Kumta ngi hap ban wad ia ki lad ki lynti bad pyrshang ban peit kumno ba ngin wanrah ia ka jingiatreilang jongki kynhun bapher bapher ban lah pynbeit ia kane ka kam”.
.){kind=link}