Shillong, Iaiong 8 : U Principal Secretary ka Sorkar Meghalaya Syed Md A Razi ula khlad hapoh ka kamra kaba u sah ha kawei ka Hotel kaba don ha Uzbekistan, ha ka jingleit kai shimet ka jongu sha katei ka ri, la iathuh ki heh ophisar ha ka sngi Baar.
U Razi udei u ophisar IRTS uba la wan trei ha ka jylla Meghalaya naduh u snem 2021. U la don ha ka nongbah Bukhara jong ka Uzbekistan naduh ka 4 tarik u Iaiong, kila ong.
La suba jur ba u Razi ula khlad na ka jingpang ‘Cardiac Arrest’.
Uwei u heh ophisar ula iathuh ba u u Razi ym shim la jubab ia kano kano ka phone call ha ka step jong ka sngi nyngkong hynrei hadien ki nongtrei jong ka Hotel kila pynpait ia ka jingkhang bad kila shem ba ula khlad noh.
Ia mynta ki jingpynkhreh bad ki jingpynbit pynbiang ban wanrah noh ia ka met ka jongu ka dang iaid shakhmat. Ka kurim jong u Razi kala don ha lynti ban leit sha Bukhara, la pyntip u Myntri Rangbah ka jylla.
Haba pynpaw ha ka rynsan Social Media ha ka X, u Conrad Sangma ula ong, “Nga dap da ka jingsngewsih ban ioh ia ka jingtip ia ka jingkhlad kynsan jong u Syed Md A Razi, IRTS bad u Principal Secretary jong ka sorkar Meghalaya”.
“U Razi udei u briew uba tbit bad uba aiti lut ha ka rukom shakri ka jongu bad kane kala paw shisha ha man la ki tnad kiba ula khmih bad ula shim ruh ia man la ki kam da ka jingsngewtrai bad kane kala ai mynsiem ruh ia kiwei pat. Nalor ka kam kaba u trei, u Razi u long u briew uba jai jai bad uba sngewtynnad bad uba la wanlam ia ka jingshai ha ka jingim jong kito kiba ula iakynduh. Udei uba la ioh ia ka jingieid bad jingburom na ki paralok ki jongu bad ka jingbym don shuh ka jongu kala wanrah ia ka jingthylli ha ngi baroh”.
