Imphal, Apr 7: Ka jingpynphiah ia u pud u sam ba thymmai ki constituency ha Manipur ka la pyniatylli ia baroh ki seng sain pyrthei ban wan hapoh kawei ka tnum hadien ka jingbthah jong ka Iingkashari Supreme Court ba ka jingphiah ia ki constituency dei ban pyndep hapoh lai bnai ban wan.
Kiba bun ki seng saiñpyrthei ha Manipur kim sngewtynnad ïa kane ka jingbthah jong ka Supreme Court. Ka jingphiah ia ki constituency ka dei kaba la pynshong nongrim naka khana samari jong u snem 2001 kaba la pynsngewsih ia jan baroh ki seng sain pyrthei bad ki la wan hapoh kawei ka tnum ban boycott ia baroh ki kam ba iadei bad kane ha Manipur.
Ha u snem 2008, la phiah thymmai ia ki constituency ha ka ri baroh kawei katkum ki khana samari u snem 2001. Hynrei ia kane ym shym la leh ïa kane ha Assam, Manipur, Arunachal Pradesh, Nagaland, kumjuh ruh ha Jammu bad Kashmir.
Ka jingsheptieng ba ka jingpynbeit thymmai ia ki constituency ba la pynshong nongrim ha ka jingkhein briew jong u snem 2001 ka bym lah shuh ban iaid lait, kala wanrah ia ka jingsngew iapher kaba jur hapdeng ki Jaidbynriew-khamtam ka jing sngew iapher kaba la jur lypa ha ka Jylla na ka jingiakynad Jaidbynriew-kaba lah ban nang pynheh ha Manipur.
Kiba bun ki nongialam sain pyrthei ki la pynpaw ia ka jingsngewkhia bad ki la kam ba ka jingkhein briew jong u snem 2001 kam long kaba dei bad ka don shibun ki jingbakla ha ka.
Ka jingpynbeit pud kaba la pynshong nongrim na ka jingkheiñ briew jong u snem 2001 ka long kongsan bha ha kine ki jingiakynad pher Jaidbynriew khatam haba ki arliang kila don lypa ha ka jingiashrut naduh u bnai Jymmang 2023.
Ha kawei pat ka liang, ka seng Congress ha ka jylla ka la dawa ban pynbeit shuwa ia ka khana samari u snem 2001 shwa ban pruid dak biang ia u pud u sam ba thymmai jong ki Constituency.
“Ka jingeh jong ki jingbakla ha ka khanasumari u snem 2001 ka la mih hadien ba la lap ia ka jingkiew kaba khlem iahap ha ki khyndai tylli ki sub-division ha kylleng ki lai tylli ki distrik ha ka jylla. La lap ba ka jingkiew ka long palat ia ka 100% ha ki katto katne ki sub-division,” ong u nongaiktien ka Congress u Hareshwar Goswami.
U la ong, “Katba ka Congress ka kyrshan ia ka jingpynbeit thymmai ia ki constituency, hynrei ka dei ban long katkum ka jingkhein briew kaba thikna. Ym lah ban len ba ka khana samari u snem 2001 ka la don shibun ki jingbym iahap.”
Ia mynta, ka Manipur ka don haduh 60 tylli ki Assembly constituency, ha kaba 40 tylli ki hap hapoh ka Central-kaba bun ki nongshongshnong ki dei ki Meitei bad 20 ha ki District ba bun ki Naga bad ki Kuki-Zomi. Lait noh ia ka Kangpokpi constituency, baroh ki hill constituency ki dei kiba la bhah ia ki Scheduled Tribe. Mynta, ka Assembly ha Manipur ka don 10 ngut ki MLA Naga bad 10 ngut ki MLA na ki Kuki-Zomi.
Baroh ki Seng sain pyrthei kila shong jingialang dangshen ha Manipur ban pyrshah ia ka jingbthah jong ka Iingkasahri ban pyndep ia ka jingphiah thymmai ia ki constituency.
Ha kane ka jingialang la wan ban iashimbynta da ki nongmihkhmat ka AP, BSP, CPI-M, NPP, CPI, JDU, NPF, RPI-A, AITC, NCP, NCP-SP, RSP, Shiv Sena, Shiv Sena UBT, bad Manipur People’s Party.
