Nongstoiñ, Ïaiong 06: Ka jingshah shoh u Syiem ka Hima Nongmynsaw Syiemship ka la kynjoh haduh shiteng snem ei ei bad mynta ka tnad pulit ka la jan dep ban pynlong ïa ka jingtohkit kaba bnïah shuwa ban leh eiei kat kum ki kyndon ain.
“Kaba sah ka long satang katto katne tylli ki jingdonkam ban pyndep. Shen ka tnad kan sa leh ïa kaba donkam”, ong u Bikram R. Marak Superintendent of Police ka West Khasi Hills District haba ïakren bad u nongthoh khubor.
U bah Donbok Snaitang Joint Secretary ka Hima Nongmynsaw Syiemship, ha ryngkat ka jingdonlang u Phlowel Syiem, Syiem ka Hima Nongmynsaw, bah Lestingdar Thongni bad kiwei kiwei ki riew pawkhmat ka hima, u la pynshai paidbah ïa ki katto katne ki kam leh pyrshah kyndon hima da u bah Passtar Nongshlong, u ba la ju long teng kum u sordar shnong ka Mawïamsyiem.
U bah Snaitang u la kynnoh ba u bah Passtar Nongshlong u dei u ba ju pynkheiñ ïa kiba bun ki kyndon ka hima, ha kaba u la ju leh marwei ïa shibun ki kam. Nalor kata u la ju shim pisa ha man la ki kam.
U iathuh ba haba ka hima ka khot ban ïakren une u briew um ju patiaw, pynban u ju ïaleh pyrshah. Kumta ka hima haba ka la bishar bniah ka la hap ban weng noh ïa u bah Passtar na ka jinglong sordar, namar la ïoh ruh shibun ki jingujor na ki paid nongshong shnong.
Lah ban kdew hangne ba u Bah Passtar Nongshlong u dei uwei na kiba hakhmat eh ban ïalam ha ka jingktah kti ïa u Syiem ka Hima Nongmynsaw Syiemship ryngkat bad ki paralok jong u ha ka jingjia kaba la jia naduh u snem 2024.
