Shillong, Iaiong 04: Ka Sorkar Meghalaya kala plie ia ka jingsdang pyntreikam ia ia ka Mission Mode Project na ka bynta ban pyniasoh (Aadhaar Seeding) ïa u Aadhar bad ki Card Rashon jong ki nongioh jingmyntoi na ka National Food Security Act (NFSA).
Ïa kane ka Mission Mode Project la plie na ka bynta ban pynthikna ba ka jingsam khaw Rashon sha ki nongioh jingmyntoi na ka NFSA kan kham khiew bad kan long kaba khuid hapoh ka Jylla.
Ïa kane ka Mission Mode la plie da u Myntri ka tnad Food, Civil Supplies & Consumer Affairs ka Sorkar Jylla u Bah Comingone Ymbon ha ka jingïadon lang u Commissioner bad Secretary u Praveen Bakshi lem bad kiwei kiwei.
Haba kren ha kane ka jingplie iaka Mission Mode Project, u Bah Coming ula banjur ïa ka jingdonkam kyrkieh jong kane ka Mission, da kaba kdew ba tang 48.77% na ki nongïoh jingmyntoi na ka NFSA kila pyniasoh ia u Aadhar bad ki Card Rashon.
U Bah Comingone ula ïathuh ba kumba 10 lak ngut ki briew kiba ioh jingmyntoi na ka NFSA kila pynïasoh ïa u Aadhaar jongki katba kiba sah haduh mynta ki long kumba 11 lak ngut.
Ula ong ba ka Sorkar Pdeng kala buh por haduh 30 tarik Jylliew 2025 ban pyniasoh ïa u Aadhar bad ki Card Rashon.
“Ka Sorkar India ka la ai por ba khatduh ia ngi kata ha ka 30 tarik Jylliew 2025 ban pyndep 100% ia ka jingpyniasoh iaki Card Rashon bad u Aadhaar. Lada ngim lah, ka Sorkar Pdeng ka lah ban ot ia ka bhah ioh khaw. Kane kam dei ka skhim jong ka Jylla, ka dei ka skhim Sorkar Pdeng kaba thmu ban pynthikna ba ka jingsam khaw kan long kaba khuid ba suba” la ong u Bah Comingone.
U Bah Comingone u la pynpaw ba ka jingpyniasoh iaki Card bad u Aadhar kan pynthikna ba ki marbam kin poi sha kiba dei hok ban ioh khaw khamtam ki nongrep, ki nongbylla sngi bad ki longkmie ha ki nongkyndong bad ha sor jong ka jylla Meghalaya.
Ula ong ba ki paidbah kiba dei ban pyniasoh ïa ki Card Rashon bad u Aadhar kidei ban leit mih sha ki ophis Deputy Commissioner, ki Ophisar Sub-Divisional bad ki Block Development Officer, ki Nongialam Shnong khnang ban ioh jingïarap.
Nalor kane u Myntri ula pyntip ba haduh mynta ki don 4500 tylli ki Fair Price Shop n ki dukan sam rashon ha kylleng ka jylla kin long kum ki jaka pynrung kyrteng na ka bynta ban pyniasoh ïa u Aadhar bad ki card rashon.
 ïa u Aadhar bad ki Card Rashon jong ki nongioh jingmyntoi na ka National Food Security Act (NFSA).){kind=link}