Shillong, Iaiong 1: Ka Shillong College ka la shim ia ka sienjam kaba khraw ban pyniar ia ki pnat ka jingshakri sa sha ki shnong kyndong da ka jingsdang ban pynieng ia u paia ba nyngkong eh jong ka campus ba thymmai ha Laitlyngkot.
Ia une u paia la pynieng ha ka sngi Nyngkong bad ia kane ka khubor la pynphriang da u MLA ka Sohra Bah Gavin Mylliem uba la ong ba ka dei u mawjam ba kongsan bha ban pynlong ia ka pule dangle jong ki kyrdan ba halor, kaba lah ban ioh kham suk da ki samla pule na ki jaka nongkyndong.
Ha kane ka jingpynieng paia la iadonlang u President ka Shillong College Governing bodu, u Principal, ki Nonghikai bad ki dkhot ka Laitlyngkot Eleka. U Bah Gavin ula pynsngew ba kane ka jingpyniar kan iarap ia ki samla pule na Laitlyngkot bad ki shnong ba marjan ba kin leit pule ia ki kyrdan pule ba halor khlem da donkam ban leit sha sor.
“Ka jingiaid lynti kala sdang ha ka 13 tarik Naitung, 2024, haba ngi la buh ia u mawnongrim jong ka project lyngba ka jingiatreilang kaba khlain hapdeng ka Laitlyngkot Elaka bad ka Shillong College. Da kane ka jingpyniar, ki samla pule shen kin sa ioh leit pule ia ki kyrdan pule ba halor khamjan nala iing” ula ong.
Ha u Naitung 2024, ka Elala Laitlyngkot kala ai sngewbha ia ka jaka ba 2.9 acre sha ka Shillong College ba kan buh ia ka campus thymmai. Ia kane ka sienjam la tyrwa da ki nongshongshnong khnang ban pynthikna ba ki samla pule ka shnong kin ioh ban bteng ia ki jingpule khlem ki jingeh ha ka pisa tyngka ne kiwei kiwei ban leit shaduh sha Shillong.
U Bah Gavin ula ong ba kane ka project kamdei satia kaba kut tang ha ka jingtei ia ka college hynrei kan plie lad plie lynti ruh ia ki samla. “Ryngkat lang, ngi la pynwandur ia ka lawei ba phyrnai”ula ong.
