Bthah ia ka NHAI ban buh kham bun ki nongtrei bad ki kor ban lah pyndep kloi
Shillong, Lber 28: Namar ka jingbym ihun ia ka jingiaid suki palat ka jingmaramot ia ka surok NH-6, ka MLA ka Sutnga-Saipung kong Mary Shylla ha ka sngi Palei, kala hiar iaid jurip ia kane ka surok bah ban peit ia ka rukom treikam ka NHAI.
Ia ka kong Mary la synran da u Deputy Commissioner bad Superintendent of Police ka East Jaintia Hills, u Project Director ka NHAI, ki contractor, u Rangbah Shnong na Umkiang bad ki riew rangbah ka thain.
Hashuwa ka jingjurip, ka MLA kala lum ia ka jingialang bishar kam hapoh ka Ophis u Deputy Commissioner ha kaba ki Heh ka NHAI kila pyntip ba kumba 65% ki kam kila dep mynta katba ka jingmaramot ba dang sah la nuh ban pyndep noh hapoh ka arbnai ban wan.
Ha ka jnghiar jurip ia ka surok, u Deputy Commissioner ula iathuh ba ki bor District kila ai ka jingiatreilang khlem sangeh bad ka NHAI ban pynthikna ia ka jingiaid shaid shaid ka kam. Ban pynsted ia ka kam, la pynjari ruh ia ka No-Entry ia ki kali heh naduh ka por 9 baje myntsep haduh 5 baje janmiet halor ka jingkyrpad jong ka NHAI, pyntip u DC.
Hynrei, la pynsngew pat ia ka jingsngewkhia halor ka jingslem ha ki katto katne ki jaka ba palat ka Sonapur, khamtam ha Kuliang, Umkiang bad Ratacherra. Ka MLA kala bthah ia ka NHAI ba kan buh kham bun ki nongtrei bad ki kor ba kan pynsted shaid shaid ia ka kam.
U Superintendent of Police ula ithuh ia ki katto katne ki jaka kaba ju sniew bha ki kali bad wanrah ia ka jingdheng kali bad ula kyrpad ia ka NHAI ba kan shimkhia bha ia kine ki jaka, da kaba pyndep noh ia ka kam hapoh ka artaiew.
Haba pynpaw ia ka jingbynniaw, ka MLA kala pynrem ia ka jingsuki palat ka kam ha ki jaka ba palat ia ka Sonapur.
“Nga la jurip ia baroh shi lynter ka surok NH-6 na Khliehriah haduh Malidor hynne ka sngi bad nga sngew bynniaw haduh katta katta. Nga sngewthuh ia ki jingeh ba mad daki nongshongshnong ka thain bad ki nongleit nongwan namar ka jingpumpum, ka jingdheng kali bad ka jingsniew ka surok. Ngan sa rah iakren ia kane ka kam sha ki bor bahlor bad nga la bthah ia ka NHAI ba kan pyndep noh ia ka jingmaramot hashuwa ban sdang ka lyiur” kala ong.
Ki trai shnong kila kyntu ruh ia ka NHAI ba kan pynsted noh ia ka kam bad kyrpad ia ki bor District ba kin iai bteng ha ka jing peit pyrman ia ka jingtrei ka NHAI.
