Shillong, Lber 26: Ka Myntri Sorkar kaba khmih ia ka tnad ka koit ka khiah ka jylla ka Dr. Mazel Ampareen Lyngdoh kala buh ia ka jingkyrpad kaba sngewrit ia ki Doctor na ka jylla Meghalaya kiba trei shabar ka jylla, ba kin wanphai noh bad noh synniang sha ka jingkyntiew ia ka Shillong Medical College.
Ia kane ka Dr. Mazel Ampareen kala pynpaw haba pynïaid ïa ka jingïalang jong ka Shillong Medical College Management Society, ha kaba kala banjur ïa ka bynta ba kongsan jong kiba don ia ka sap ka phong ban pynwan dur ïa kane ka jaka pule kaba pawnam.
“Ngi kwah ia ka ‘Ghar Wapsi’ kaba don ha ka kynhun ki doctor da kaba ngin khot ia ki khun shynrang bad kynthei jong ngi ban wan biang bad ban ia don bynta lang ha kane ka jingthmu kaba kongsan,” kala ong.
Shuh shuh ka Dr. Lyngdoh kala iathuh ba ka sorkar kala jop ia ka mukotduma kaba iadei bad ka Suraksha Centre barim bad ngi dap da ka jingsngew kmen bad ngin pynthikna ba ia ki Administrative Block la aiti sha u kontraktor, kaba plie lad ban leh ia ki kam pynroi kiba kham bniah.
Ka Dr. Mazel Ampareen kala iathuh ba ka jingpynrung kam ia ki nonghikai kala iaid shakhmat, ha kaba ki Professor kiba dang shu thung thymmai kila dep ban rung ha ki kam jong ki. La pynbeit ia ki jaka sah ha kawei ka iing kaba don 12 tylli ki unit, bad la ai ia ki kam hikai jong ki tnad—kiba kynthup ia ki jingpule ha kaba iadei bad ki met briew.
Ban weng ia ki jingeh kiba lah ban mih, la thmu ban pynlong ia ka jingialang kaba shi sngi ha kaba ki khlieh jong ki tnad bad kiwei kiwei ki nongshim bynta.
Shuh shuh ka Dr. Ampareen Lyngdoh kala ong, “Ngi donkam ia ki kamra hikai kiba biang, ka Library kaba biang bha bad baroh ki tiar kiba donkam ban pynthikna ia ka jingtreikam kaba suk jong ka jaka pule”.
