Shillong, Lber 18 : Ka Sorkar Jylla kala bthah ia ka Meghalaya State Pollution Control Board (MSPCB) ba kan leit jurip bad leh ia ka audit kaba janai bha ia ka jingpynmih tdem jong baroh ki karkhana kiba don ha sor Byrnihat bad ban aiti ia ka kaiphod halor ki sienjam bala shim hapoh ka 7 sngi.
Ia kane ka hukum la pynmih da u Commissioner & Secretary ka Tnad Forest & Environment Pravin Bakshi ha ka sngi Ba-ar hadien ka jingmih khubor ia ka jingioh jingithuh ka sor Byrnihat kum ka sor ba jaboh tam ka lyer ha ka pyrthei namar ka jingjur ka jingpynmih tdem.
“Kat kum ka jingbthah bala pynmih da u Myntri Rangbah ka Jylla hadien ka jingialang bad ki Heh Ophisar ka Tnad Forest & Environment- la bthah ia ka MSPCB ba kan leh ia ka audit kaba bniah bha bad jurup ia baroh ki karkhana kiba don ha Byrnihat sha ka liang ka Jylla Meghalaya” ong u Bakshi.
“Ia kane ka audit dei ban pyndep da ka MSPCB hapoh ka shi taiew bad ban aiti ia ka kaiphod sha ka Tnad Forest & Environment” ula bynrap.
Ula ong ba dang shen u Myntri Rangbah ula ai ia ka jingkren kaba bniah bha ha ka Dorbar Mang tyngka ka Iingdorbar haba iadei bad ki kaiphod ba mih na ka ri bad nabar Ri bad kyrpad ia ka jingiatreilang hapdeng ka Assam bad Meghalaya. Ula phah ruh ia ka shithi sha u Myntri Rangbah ka Assam ba kin ia leh eiei lang namar ba bun ki karkhana ba don ha u dak saw ki dei kiba don sha ka liang jong ka Assam.
U pyntip ba ka Assam Pollution Control Board kala shim mynta ia ki sienjam ban leh eiei bad kala pynlong ruh ia ka audit bad jingjurip iala ki jong ki karkahna.
“Ha kajuh ka por, ka Sorkar Meghalaya ruh kala shim ia ki sienjam ba tyngeh ban peitngor bad shong bishar ia ka jingpynmih tdem da ki karkhana kiba hap hapoh ka Jylla” ula ong.
 ba kan leit jurip bad leh ia ka audit kaba janai bha ia ka jingpynmih tdem jong baroh ki karkhana kiba don ha sor Byrnihat bad ban aiti ia ka kaiphod halor ki sienjam bala shim hapoh ka 7 sngi.){kind=link}