Guwahati, Lber 16: Ha ka jingkhynra pyrshah ïa ka kam khaïi drok ha ka pyrthei, ka Narcotics Control Bureau (NCB) ka la ioh ban kurup ïa ki dawai pynbuaid ba la tip kyrteng kum ki methamphetamine ba shongdor haduh T. 88 klur bad la kem ïa saw ngut ki briew kiba don jingiadei bad ka kynhun khaïi drok na kiwei ki ri ha ki jingkhynra ba la iatreilang ha Imphal bad Guwahati.
U Amit Shah uba dei u Myntri kam poh iing ka Ri u la iaroh ia kane da kaba pynskhem ia ka polisi jong ka sorkar kaba pyrshah jur ïa ka jingkhaïi drok.
Ha ka jingkynthoh ha X, u la ong, “Yn ym don jingmap ne isynei ïa ki kynhun khaïi drok. Kane long ka jingpynshisha ïa ka jingtreikam kaba itynnad jong ka rukom tohkit kaba naduh na trai sha jrong bad na jrong sha trai bad ka jingkhynra jong ngi ia u drok kan dang iai bteng. Ka jingai khublei kaba khraw ia ka kynhun NCB.”
Ha ka 13 tarik u bnai Lber, da kaba khang kdong bad pynap shrip ki ophisar ka NCB ki la ioh bat ïa kawei ka trok hajan Lilong bad hadien ba ki la wad bniah bha, la lap ïa ki 102.39 kg ki dawai methamphetamine ba la buhrieh ha ka synduk buh tiar jong ka trok. Halor kane la kem ia arngut kiba don hapoh ka trok bad bud pat sa kem ia u nongpdiang ïa ki ha Lilong.
Ha kane ka jingjia la kurup ruh ia kawei ka kali saw shaka bad la suba jur ba kitei ka mar kidei kaba la wan na Moreh, kaba dei ka jaka iaid lynti kaba kongsan ha khappud ka India bad ka Myanmar.
Ha kane kajuh ka sngi, ka kynhun jong ka NCB ha Guwahati ka la ioh bat ia kawei ka kali SUV hajan Silchar ha khappud ka jylla Assam-Mizoram. Ha ka jingwad bniah la lap ba 7.48 kg ki dawai methamphetamine ba la buhrieh ha ka tyre spare jong ka kali. La kem ia u nongniah kali, bad ha ka jingtohkit la ong ba ka Moreh ka dei ka tynrai bad ka Karimganj ka dei ka jaka ba la thmu ban pynpoi.
Nalor ka jingshah kem, ka NCB ka dang shimti ruh ïa kawei ka mukotduma ba kyrpang na ka Mizoram State Excise Department, ha kaba la kurup 46 kg u drok crystal meth ha ka thaiñ Brigade Bawngkawn jong ka Aizawl ha ka 6 tarik u Lber. La dep kem saw ngut ki briew ha kaba ïadei bad kane ka mukotduma, bad mynta ka NCB kan tohkit ïa ka jingïadei halor kane ka case.
Ka thain shatei lam mih ngi ka la kylla long ka jaka pdeng ban khaïi drok namar ka jingdon ka khappud bad ki jaka ba heh kiba pynmih drok. Kum ka jubab, ka Ministry of Home Affairs (MHA) ka la pynkhlain ïa ka jingdon ka NCB ha u snem 2023 ban pynjur ïa ka jingïakhun pyrshah ïa ki kynhun nongkhaïi drok.
