Nongpoh, Lber 12 : Ki Pulit Traffic ka Nongpoh Branch, kila pynbna ba pynjari noh da ka kuna kaba kot haduh T.10,000 ia ki kali kiba pynkhein ia ki kyndon jong ka Motor Vehicle Act hapoh u pud u sam jong ka Branch.
Ki Pulit Traffic ka Nongpoh kila shim ia kane ka rai haba sakhi ia ka jingjur ki jingjia aksiden kali hapoh ka thain namar ka jingniah kali thurmur bad khlem akor, ka jingniah kali haba shong khawiang, niah kali khlem ki kot ki sla bad kiwei kiwei.
Ia kane ka rai la pynbna hadien ka jingiakynduh hapdeng ki Pulit Traffic ka Branch bad ki nongkitkam ka Nongpoh Region Auto Owners and Driver Association (NRAO&DA), hadien ka jingshem ba bun ki nongniah kali arshaka, lai shaha bad saw shaka ki ju mlien ban niah kali haba shoh khawiang-kaba buh jingma shikatdei eh ia kiwei nalor ka jingbym pynbiang ia ki kot ki sla ba donkam bad kiwei kiwei.
U Traffic Officer Bah B Thangkhiew ula pyntip ba ki Pulit Traffic kin pyntreikam noh ia ki jingpyrrkhing kiba tyngeh ia ki briew ba pynkhein ia ka kyndon 185 jong ka MVA Act bad la rai b aka jingdain kuna kan long T.10 hajar ia kiba niah kali hapdeng ka jingshoh khawiang.
Une u Heh Pulit ula bthah ba baroh ki nongniah kali kamai ki dei ban pynbiang noh ia ki kot ki sla naduh ki permit, registration, insurance bad kiwei kiwei lem kumta kin ngat ha ka jingshah dain kuna.
U President ka NRAO&DA Bah Banasar Lyngdoh ula pynpaw ia ka jingkmen ban iatreilang bad ki bor Pulit pyniaid kali haba kyntu ia baroh ki nongniah Auto Rickshaw ba kin kohnguh bad bud thik ia ki kyndon ain khamtam ban kiar n aka jingdih kyaid haba niah kali ba kin lait na ka kuna.
