Pynshai ka Myntri ba thung ka Meghalaya High Court ia ka Committee u Justice (Retd) BP Katakey

Kam hap ha ka bor jong ka Sorkar Jylla ban tuklar ia ka Committee u Katakey

Shillong, Lber 12 : Ka Myntri ka tnad Ain Kong Ampareen Lyngdoh ha ka sngi Balang kala ong ba ka Committee u Justice (Retd) BP Katakey ka dei kaba la thung da ka Iingkashari Meghalaya High Court bad kam hap hapoh ka bor jong ka Sorkar ban iakren ia kum kane ka kam namar ka dei kaba la mana (subjudice) hakhmat ka Iingkashari.

“U Justice ba khlieh ia ka Committee u dei uba la thung da ka Meghalaya High Court bad kam hap hapoh ka bor jong nga ne ka bor jong ka Sorkar ban iakren ia kane ka kam namar ka long subjudice” ong ka Myntri haba jubab ia ka cut motion bala wanrah da u President ka Voice of The People Party (VPP) Ardent M Basaiawmoit hapoh ka Iingdorbar.

Haba sot ia ka khubor ba mih ha ki lad pathai khubor, u Bah Ardent ula kynnoh ba ka Sorkar Jylla kala iakren halor ka jingthmu ban pynwai noh ia ka jingshakri jong u Justice BP Katakey, uba khlieh ia ka Committee uwei u briew bala thung da ka High Court ba iadei bad ka kam tih dewiong beain hapoh ka Jylla.

“Kat kum ki khubor, ka Sorkar kala pan ia ki jingmut na ki stad ain hashuwa ba kan buh ka jingkyrpad hapoh High Court ban pynkut noh ia ka jingshakri jong u. La paw ba ka jingthrang jong u Judge ban sei madan ia kajingtih dewiong ba khlem jingbot ka dei ka daw bah ba ki briew kiba don ha ka bor bad ki coal mafia ha ka Jylla kim sngewshngain satia” ula ong.

Ula bynrap ba la pyntip ba naduh bala thung ia u ha u Iaiong 2022, u Justice Katakey ula aiti da ki dorjon ki kaiphod kiba pynthikna ia ka jingdon ka jingtih dewiong beain bad khaii beain ha kylleng ki jaka jong ka Jylla.