Nongstoin, Lber 12 : Ki pulit ka Mawshynrut Police Station, kila kem ia 4 ngut ki briew kiba suba donkti ha ka jingthombor ia ka Iingsah ka para jong u MLA ka Mawshynrut ha ka miet sngi ba-ar ha shnong Seinduli-1.
Kane ka Iing ka dei jong ka Kong Theresa Dkhar, para u MLA Bah Methadius Dkhar. Kane ka Iing kala shah lun maw bad bilor hynnin ka miet ha ka por 11:30 baje eiei.
Ki Pulit haba iohpdiang ia ka ejahar, kila pynlong mar mar ia ka jingtohkit bad kila ioh kem ia 4 ngut ki briew kiba suba donkti ha kane ka kam.
Kine ki saw ngut ki kyrteng u Skhemborlin Hoojon ba na Nongryngkew A, uba dei u trai jong ka kali Grand Vitara ML10-D-0254 bala pynpaw ha ka ejahar, u Firstbornshine Paliar ba na Seinduli-1, u Shanborlang Syiem ba na Seinduli-1 bad u Silicus Swangre ba na Tynhiang.
Ki Pulit kila kurup ruh ia ka kali Grand Vitara jong u Skhembrlin Hoojon.
Ki Pulit kila register case ia kine ki briew hapoh ka kyndon 125/324 (4) BNS bad ka jingtohkit mynta kala iaid shakhmat.
