Kam u VC ka NEHU ba kynshoit ki khwan myntoi ia ka jingiakhih ki samla Pule | Kyntu ban pynleit jingmut ha ki jingpule

Shillong, Lber 11: U Vice-Chancellor ka skul bah North-Eastern Hill University (NEHU) u Prof. Prabha Shankar Shukla u la kynnoh ba ka jingiakhih kaba dang iai bteng jong ki samla pule hapoh ka University kadei kaba la pynshit da ki briew kiba khwan myntoi shimet ha ka jaka jong ki mat sngewkhia ba dei hok jong ki samla pule.

Ha ka shithi ba la thoh sha ki samla pule bad ki dkhot jong ka union, u Prof. Shukla u la pynpaw ïa ka jingsngewkhia kaba jur halor ka jingïakhih kaba nang jur, da kaba ong ba kane ka jingïakhih ka la kynriah noh na ki mat ba shisha jong ki samla pule bad mynta la pyndonkam bakla ïa ka na ka bynta ka jingmyntoi saiñ hima sima bad ka jingmyntoi shimet.

U Vice-Chancellor u la maham ba ka jingiai bteng jong ki jingïakhih kan buh ïa ka jingpule bad ka lawei jong ki samla pule ha ka jingma.

“Ha ka jaka ban pynleit jingmut ha ka jingpule, ka jingwad bniah, bad ka jingroi jingpar shimet jong ki samla pule, mynta la shah ialam bakla ha ki briew kiba don la ka jong ka jingkhwan myntoi shimet,” u la pynpaw bad bynrap “kito kiba pynmih ïa ki jingïakhih kin ym mad ïa kano kano ka jingeh, hynrei dei ki samla pule ba kin hap kynduh jingeh”.

Shuh shuh u Vice Chancellor u la ong, “Dei ma phi ki samla pule ki ban shah ktah bha, ka por pule jong phi ka la shah pynthut, ka lawei ha ka ioh kam ioh jam jong phi bad ki jingpule kiba kham shalor ki don ha ka jingma, bad ka nam jong ki degree jong phi ka la shah pynsniew”, ong u Prof. Shukla.

“Pyrkhat ia ka jingangnud bad ki thong ba phi don, bad ka jingaiti ki bahaiing jong phi ki la leh ban kyrshan ia ka jingpule jong phi, wat ailad ba ki jingangnud jong ki katto katne ngut ki riew shimet kan pynjot ia ka lawei jong phi, ong u VC.

“Kum u Vice-Chancellor, ka kamram jong nga ka long ban pynlong ïa ka skul bah NEHU kum ka jaka kaba ki samla pule kin roi ha ka jinglong jingman kaba shngaiñ bad kaba suk. Nga kyntu ia ki samla pue ban sangeh noh ban iashim bynta ha ki jingiakhih ba la ialam da ki katto katne ki riew khwan myntoi bad trei ban tei pat ia ka skulbah da ka jingstad, ka jingiai shah, bad ka jingburom markylliang,” la pynpaw u VC.