Dang iakren ka Sorkar sha Delhi ban pyllait noh ia ka kam tih par ka juk hyndai

Thaw Committee ka Sorkar ban bishar thymmai ia ka Minor Minerals Rules

Shillong, Lber 10: U Myntri Rangbah ka Jylla Conrad K Sangma ha ka sngi Nyngkong, ula pyntip ba ka Sorkar Jylla ka dang iakren bad ka Sorkar Pdeng ban ailad ha ka ban pynbna ia ka jingtih par ka juk hyndai (traditional mining) kum ka kam ka bym hap shuh ha ka kam tih par (mining).

“Ngi dang pyrshang ban ioh jingbit na ka Sorkar Pdeng ban shah ia ngi ha kaban pybna ia ka jingtih par ka juk hyndai kum ka kam bym hap shuh ha ka jingtih par” ong u Conrad haba jubab ia ka jingkylli bala wanrah da u MLA ka VPP na Mawryngkneng halor ka jinglong jingman ka kam tih shyiap hapoh ka Jylla.

U Conrad ula pyntip hapoh ka Iingdorbar ba ka Sorkar kala thung ia ka Committee ka ban shong bishar ia ka Meghalaya Minor Minerals Concession Rules (MMMCR), 2016 hadien ba bun ki dkhot kila pynsngew ia ka jingsngewkhia kiba iadei bad ka nongtih par barit baria, kiba tih par da ka juk hyndai hapoh ka Jylla.

“Ngi iohi ba ki nongtih par barit baria, kiba tih da ka juk hyndai, kila tih ia ki mar tang ban pyndonkam hala ki shnong ki thaw ne ki kam tei jingtei kiba rit ba ria. Kumta, ngi sngew ba hadien ka jingialang bad ki dkhot, ngi la iakren sani bha bad u Symbud Myntri Rangbah bad thaw ruh ia ka Committee ha ka 16 tarik Nailur, 2024, ha kaba ki dkhot baher bapher kynthup ki MLA bad ki Ophisar na ka Tnad Mining & Geology bad Tnad Forest nalor ki kynhun bapher bapher khamtam ki nongtuh par kila iadon lang kum ki dkhot. La arsien la dep pynlong ia ka jingilang bad la ai jingmut ba ka permit ban tih par da ka juk hyndai dei ban pynjynsur bad pynsuk” ula ong.

Ula bynrap “Haba pynshong nongrim ia kane, ka Committee kala ai jingmut ba tang khyndiat eh ki kot ki sla kin dei kiba donkam ban ioh jingbit- kata ka Forest Clearance ban pynthikna ba kam dei ka jaka khlaw bad ka No-Objection Certificate (NOC) na u Rangbah Shnongban pynthikna ia ka jinglong trai ia ka jaka bad ka jingbym don ka jingiakajia”.

“Kane ka jingai jingmut kala wan sha ka Sorkar Jylla bad ka Sorkar kala pyniaid shakhmat ia ka kam ban ioh jingbit na ka Sorkar India ba kan shah ia ngi ha kaban weng noh ia ki jingdonkam ia ki jingbit naba kine ki par ki dei kiba rit bad ba don ruh ki kyndon hapoh ka ain ban aplai ha kaban pyllait ia ki na ka Environment ProtectionAct, 1986” ong u Conrad haba bynrao “Ngi la trei shitom bha halor kane naba bun na ki nongtih par barit baria kila mad ia ki jingeh namar ki kyndon hapoh ka Rules ki dei kiba bun ki jnit ki jnat kaba pynshem jingeh ia ki nongtih par ban lah pynbiang”.

Shuwa kane, u Myntri Rangbah ula ong ba ka jingtih maw bad ka tih syiap hapoh ka Jylla ka dei kaba la teh pyrrkhing bha kat kum ki kyndon ka Meghalaya Minor Mineral Concession Rules, 2016, kaba long kat kum ka kyndon 15 jong ka Mines & Minerals (Development & Regulation) Act, 1957 (Central Act No 67 of 1957).

Ia ka jingtih syiap la tehkyndon kat kum ki kyndon ka Sustainable Sand Mining Management Guidelines, 2016 bad ka Enforcement & Monitoring guidelines for Sand Mining, 2020, kiba la pynmih jingpynbna da ka Ministry of Environment, Forests & Climate Change, ula bynrap.