Shillong, Mar 7: Ka Laitkor SC kaba la shah thep 3 kol da ka jinglah ban ialehkai bha, kala lah ban pyniakhaid bad ka Nangkiew Irat da 3-3 ha ka jingiakhun ha ka OC Blue Shillong Premier League 2024 kaba la long hynne ka sngi ha SSA Stadium ha First Ground, Polo.
Ha ka kylla step ka jingiakhun kala long kaba noh shilliang ha kaba ka Nangiew Irat kala ioh ban thep 3 kol bad mar synsdang ka jingiakhun u Damehun Syih ula thep kol ha ka 7 minit, u Jefferson Pakyntein ula thep ia ka kol ha ka 17 bad 27 minit. Ka Laitkor kala ioh ia ki kabu hynrei kam shym la lah pat ban thep kol bad bun kila mutdur ba ka Laitkor kan dang shah thep kol shuh shuh sa ha ka kylla miet.
Haba la sdang ia ka jingiakhun haka kylla miet, ki nongialehaki jong ka Laitkor kila iakhun tyngeh bad u Risuk Malngiang ula thep ia ka kol ha ka 55 minit bad u Fridison Wanniang ula thep ia ka kol ha ka 69 bad 75 minit kaba la pyniakhaid syndon ia kane ka jingiakhun.
Kane kadei ka jingiakhun kaba khatduh ia ka Nangkiew Irat bad kala ioh 26 point bad don ha ka kyrdan kaba 4, katba ka Laitkor kaba dang sah sa kawei ka jingiakhun kala don ha ka kyrdan kaba 6 bad kala ioh 24 point kaba mar katjuh bad ka Langsning FC hynrei kaba la khlain pat ha ka jingioh thep kol.
Ka Laitkor kan iakhun pyrshah ia ka Mawlai SC ha ka por 3 baje mynsngi ha ka Sngi Nyngkong. Ka Mawlai kala pynrem teng da 1-0 ia ka Laikor ha ka jingiakhun kaba la long ha ka 4 tarik u Kyllalyngkot. Lada ka Mawlai ka jop ia kane ka jingiakhun kan pynthikna ba kan ioh rah laisien lynter ia ka nam lahduh jong ka OC Blue SPL.
