Shillong, Lber 07 : Ka Iingkashari Meghalaya High Court ha ka sngi Thohdieng, kala bthah ia ki bor District ba kin leh eiei kat kum ka lynti ka ain pyrshah ia ka jingkyntur pud thymmai da ki nongshong dukan madan ba beain haba pan ruh ia ka sienjam bala shim (action taken report) halor ka jingpyntreikam ia ki policy, plan bad ki jingtyrwa ban pynlong ia ka Nongbah ka Meghalaya-ka Shillong, kum ka sor ka juk mynta, kaba khuid bad kaba pyniaid bha.
Haba pynmih ia ka hukum hadien ba shong bishar ia ka PIL halor kane ka kam, ka Iingkashari ba kynthup ia u Chief Justice IP Mukerji bad Justice W Diengdoh kala ong “…ngi bthah ba ki nongshah mudui ki dei kyrkieh, ban pyntreikam iaki policy, plan bad ki jingtyrwa kiba la don ha ka kaiphod (bala pynkhreh da u Commissioneer & Secretary ka Tnad Urban Affairs)”.
“Ha kane ka por ba dang khmih ia ka kam, ki bor District ki dei ban peitngor pyrrkhing bha hapoh ka Sor ban ithuh, weng bad khanglad ia ka jingkyntur thymmai ia ki surok da ki nongshong dukan madan ba beain bad ban leh eiei pyrshah ia ki kat kum ka ain, ban bteng ha kaban dain kuna ia ki nongniah kali ki bym burom ia ka Traffic rules bad ka jingpynieng kali ha ki jaka bym shah pynieng bad ban pynthikna ruh ba kam dei ban nang rit ka surok da ka jingkyntur pud jongki nongshong dukan madan, ka jingpynieng kali beain bad ter ter” kala ong.
“Ngi buh ia kane ka PIL ba kan wan phai sha ka jingbishar ha ka 8 tarik Jymmang, 2025. Hapoh ka 6 tarik Jymmang 2025, u Commissioner & Secretary ka Tand Urban Affairs u dei ban ai sa kawei ka kaiphod ba pyni shuh shuh ia ki kam bala leh halor kane ka kam” bthah ka Iingkashari.
Ka kaiphod jong u Commissioner & Secretary ka Tnad Urban Affairs kala pyntip ba ka tnad kala leh ia ka survey halor ka jing don ki nongshong dukan madan ha Shillong. Ka Provissional Town Vending Committee kala shong lai tylli ki jingialang ha ka 5 tarik Nohprah, 2024, 5 tarik Rymphang 2025 bad 14 tarik Rymphang 2025.
La ithuh haduh 25 tylli ki jaka ban pynshong dukan madan ha kylleng ki jaka ka sor Shillong, ban ai jaka ia ki 1400 ngut ki nongshong dukan madan naduh ka 7 tarik Rymphang, 2025.
Ka kaiphod ka iathuh ruh ba ka Tnad kala dep pynmih ia ka jingpynbna ban pynkynriah ia kiba bun ki nongshong dukan madan haba pyntip ba kane ka sienjam ka long “ban pynbeit ryntih ia ka jingtreikam ki dukan madan bad pynthikna ia ka jingpynkynriah kaba iaid beit iaid ryntih sha ki jaka shong dukan madan ba thymmai”.
La pyntip ba la thaw ruh ia ka State Level Committee ban iatreilang ha kaban buh kyndon ia ka jingiaid ki kali ha ki 7 tylli ki zone ha Sadar, Madanrting Traffic Branch, Rynjah Traffic Branch, Mawlai Traffic Branch bad Laban Traffic Branch.Ka Committee ka dei ruh ban ai jingmut halor ki jaka pynieng kali bad ki bym dei ban pynieng kali nalor ban iatreilang bad ki Dorbar Shnong bad ban ioh ia ka jingmynjur ha kaban phiah ia ki jaka pynieng kali bad ki jaka bym dei ban pynieng kali.
Nalor kane, ka Iingkashari kala ong ba ka sienjam kaba biang eh la shim da ki bor District ban thaw ia ka Parking Policy bala tip kum ka Shillong Parking Policy, 2025.
Ki bor district kilatyrwa ruh ban thied ban pyniaid ia ki 35 tylli ki bos ka juk ba mynta kiba don lut ia ki kor baroh, ki ban pyn duna ia ka jingpyndonkam ia ki kali shimet ha ki surok ka sor.
 halor ka jingpyntreikam ia ki policy, plan bad ki jingtyrwa ban pynlong ia ka Nongbah ka Meghalaya-ka Shillong, kum ka sor ka juk mynta, kaba khuid bad kaba pyniaid bha.){kind=link}