Shillong, Lber 04: U Symbud Myntri Rangbah ba khmih ia ka kam pohiing Bah Prestone Tynsong hynne ka sngi Baar, ula ong ba ki Pulit kila pyrshang katba lah ban wad ia u Bah Kasterbok Kharbuli, u nongshong shnong ka Sohryngkham, uba la jah naduh u bnai Naiwieng jong u snem ba la dep.
Haba jubab ia ka Call Attention kaba la wanrah da u MLA ka VPP na Mawryngkneng Bah Heaving Stone Kharpran ha ka iing dorbar thawain, u Bah Prestone Tynsong, ula ong ha ba ioh ia ki jingpyntip ha ka 3 tarik u Naiwieng 2024, ki pulit ka Sohryngkham kila sdang mardor ia ka jingtohkit bad kila leit ruh ban pynlong ia ka jingwad ha kylleng ki jaka.
Katkum ka jingtohkit kaba la leh mardor, la phah ia ka khubor peitngor sha baroh ki Officers in-charge bad ki in-charge jong ki Police Station, Outposts bad Beat House ha kylleng ki jaka jong ka jylla Meghalaya bad Assam ban lapdien bad ban bat ia une u briew uba la jah lada jia ba ki lap ia u.
U Bah Kharbuli, udei u riewshimet u bym biang ha ka bor pyrkhat pyrdain bad ula jah ha ka por 8:30 mynstep ha ka 1 tarik u Naiwieng 2024.
Ula pyni ba la ai ia ka notis halor ka jingjah jong u Bah Kharbuli ha ka 11 tarik u Naiwieng bad u Special Superintendent of Police (CID), Meghalaya ula phah ruh ia katei ka notis sha ki Director General of Police (DGP) ha kylleng ki jylla, ki Commissioners of Police, New Delhi & Chandigarh, Inspector Generals of Police jongka Lakshadweep, Dadra & Nagar Haveli, Daman & Diu, Ladakh bad ki Superintendents of Police ha baroh ki district jong ka Meghalaya.
“Wat hapdeng ka jingpyrshang ia kitei baroh, ym shim la lah ban lap ia u Bah Kasterbok Kharbuli bad ka jingtohkit halor kane ka kam ka dang iaid shakhmat. Ki jingpyrshang ki dang iaid shaphrang ban lap ia une u riewshimet uba la jah klep bad ka jingwad bad ka jingtohkit ruh ka la long da ka jing iatreilang” ong u Bah Tynsong.
“Ka Search and Rescue Team kala iatreilang ban leit wad ha kylleng ki jaka, ban lap ia une u riewshimet bad kid nag buddien ruh ia ki jinglapksai kiba lah ban iarap ban tip shaphang ka jngdon ka jongu u Kasterbok Kharbuli,” ula ong.
