Shillong, Lber 02 : Ka Meghalaya Power Distribution Corporation Limited (MePDCL) kala pynbna ban ai skhim siew pynkhuid ia ka bording ba shisien siew (one-time settlement scheme) ia ki Longiing ba pyndonkam ia ki Domestic Low Tension (DLT) bad Kutil Jyoti/BPL consumer, kiba la shah ot bording.
Kat kum kane ka skhim, kine ki longiing ki dei tang kiba thang bording hapoh ka 5KW bad la ai sha ki ia kane ka skhim ba kin lah ban siew khuid noh ia baroh ka bai bording ba khlem pat siew.
Kane ka skhim bala tip kum ka OTS scheme, 2025, kan treikam naduh ka 1 tarik u Lber haduh ka 31 tarik u Lber.
Tang ki longiing kiba la ngat ha ka jingshah ot bording ki lah ban aplai ia ka OTS scheme 2025 bad ban ioh ia ki jingmyntoi, ong ka jingpynbna bala pynmih da u District ka MePDCL.
Ban ioh ia kane ka OTS scheme 2025, ki nongthang bording ki lah ban lei tai ia ki aplikeshon sha u Assistant Executive Engineer (AEE) jong ki Distribution Sub-Division ba dei khmih ia ki. Ki AEE kin sa pyniaid ia kine ki aplikeshon bad pynmih ia ka OTS ha ka billing software.
Ki nongthang borrding kiba kwah ban shim ia ka OTS scheme 2025 kin ioh jingmyntoi da kaba weng noh ia ka kuna ba 100% kaba ki khot ka Delay Payment Surcharge (DPC), ka ban khein haduh ka bill ba khatduh naduh ka sngi ba ioh ia ka OTS scheme.
Ia ka jingsiew kaba sah hadien bala khate ia ka DPC, ki nongthang bording ki lah ban jied ha kaban siew ha kine ki ar bynta-ka jingsiew ba shisien siew lane siew haduh 6 installment khlem ka sut. Hynrei, ka installment ba nyngkong kan long 40% na ka pisa bas ah baroh, ka 60% ba tam pat yn sa pyniabynta ha ki 5 tylli ki installment.
Lada jia ba ki nongthang bording ki jied ia kine ki installment, ia kine ki installment yn sa khein lang kum ka pisa ban siew ia ka OTS bad yn khein lang ha ryngkat ka bill ba dang shu ioh. Bad ia ka sngi ban siew ia ka installment kan dei kajuh kum ka bill ba ki ioh thymmai.
Lada jia ba kim lah ban siew ia ki installment, ia ka DPC yn sa pynim biang ha ryngkat bad ka installment ba dang sah bad yn sa bynrap ia ka ha ka bill ba ioh thymmai.
