Shillong, Rymphang 25: Ka Tnad Agriculture and Farmers Welfare jong ka sorkar jylla kala thaw ia ka histori da kaba shalan ha ka sien kaba nyngkong eh ia 15 MT u sying ka Jylla Meghalaya sha ka Dubai Lulu Group da kaba iatreilang bad ka Agricultural and Processed Food Products Export Development Authority (APEDA).
Kane ka jingjop ha kaban ioh ban shalan ia u sying kadei da ka jingkyrshan jongka Eastern Ri-Bhoi Organic Farmer Producer Company (FPC), kaba la pynkhlain ia ka jingkular ka jylla ban kyntiew ia ka kam khaii ia ki marrep jong ki nongrep shabar ka ri.
Kum shi bynta jong ka jingphah shalan shabar ri ia ki marrep, la pynlong da ka jingialang ban phah ia kine ki marrep, ia kaba la wan ban iashimbynta da ki heh jongka APEDA, Ministry of Economic Affairs bad IFAD ka long ka jingsdang ia ka lynnong kaba thymmai ia ka jylla ban kyntiew ia ka jingpynmih ia ki marrep kiba khlem ai dawai (Organic) bad kaba pynkhlain ruh ia ka jingpyniaid iew ia ki marrep bad ban weng ia ki jingeh kiba iakynduh.
Ka kam rep kam riang ha ka jylla kala mad ia ki jingeh kiba bun naduh ia ka jinglongtrai ia ka khyndew ka shyiap, ka jingbym ioh jingkyrshan ha ka pisa ka tyngka bad ka jingbym don ia ka pisa nalade.
Hynrei kawei hi na ki jingeh kaba ki nongrep ki mad kadei ka jingbym lah ban pyniasoh bad ki iew ki hat bad kane kala lam sha ka jingshah khynniot dor ki marrep, hynrei da ka jingtuklar ka sorkar, ki kynhun kiba iadei bad ka kam rep kila lah ban pynmih bad ban pyniaid iew ia u sying, kaba pyni ba ki sienjam kiba la shim na ka bynta ki nongrep ka lah ban kyntiew shibun ia ki ha kiba bun ki liang.
Ka Eastern Ri-Bhoi Organic FPC, kala sdang treikam ha u snem 2017 hapoh jongka Mission Organic Value Chain Development for the North Eastern Region (MOVCD-NER) bad kala leh ia ka bynta kaba khraw ha kaban plie lad ia ka jingkhaii bad ka FPC kala sdang na kaba rit mynta kala pyniar ia ka jingtreikam ka jongka, ha kaba la pyndonkam ia ki kor ki bor kiba biang ha kaban sait ia u sying, ban ot, ban pyntyrkhong bad ban song. Ka FPC mynta kala kyrshan ia palat 500 ngut ki nongrep na ki 9 tylli ki shnong, ban pynthikna ba kin ioh die ha ka dor kaba biang bad ruh ban don ka jingpyniaid iew ia ki marrep kiba ki pynmih.
Katba dang iaid ki snem, kane ka jingatreilang kala lam ha kaban kiew ka jingioh na ka T.17 lak ha u snem 2018-19 sha ka T.374 lak ha u snem 2023-24, kaba pyni ia ka jingiaid shakhmat jong ka iew ka hat lyngba ka jingai iaka kyrshan kaba dei.
U Chief Executive Director jong ka Eastern Ri-Bhoi Organic Farmer Producer Company u Bah Revistar Kharumnuid, ula kubur ba lyngba ka jingiatreilang kaba la lam sha une u mawmer bad ula pynpaw ia ka jingsngewnguh ia ki nongrep, ki tnad sorkar bad ia ki heh ki hain kiba la plie lad bad ai jingkyrshan ban pyniar ia ka jingkhaii pateng.
Katba u Chairman ka APEDA Abhishek Dev, ula pynpaw ia ka jingkongsan ia ka jingkhaii lyngba ki jhad ban pynlong ia ka jingkhaii ia ki marrep na ka ri India kaba don ia ka jingiakhun bad kiwei pat bad ula ong ba ka jingkhaii da kaba pynkit da ki jhad kan pynthikna iaka jingdon ka jingiakob ha kaba iadei bad ka dor bad u ngeit skhem lyngba ka jingiatreilang kaba iajan bha bad baroh kiba donbynta, ki mar kiba pynkit da ki jhad, yn pdiang bha da ki iew kiba don ha UAE.
“Ka don ka jingsngewtynnad bha ia ki mar kiba napoh ka ri India bad ngi lah shah khot kum ki paralok kiba iatreilang na ka bynta ka Gulf Food 2026 kaban sa wan, kumta nga kyntu ia ki nongiashimbynta ba kin pynkhreh bha ban iashimbynta dang kloi Gulf Food 2026 kaban long ha ka 26-20 tarik u Kyllalyngkot ban pyninam ia u sying uba na ka ri India” la ong u Abhishek.
“Ka jingdon ia ka shap Organic ne bym ai dawai dashin ia ki marrep ka pynthikna ba ka don ka jingkiew jong ka dor kaba kot sha ka 30-40% bad ula ong ba ka APEDA ka iengskhem ha kaban kyrshan ia kiba donbynta lang ha ka kam ban ioh iaka syrnod Organic bad wat na ka jingioh iaka syrnod na ka jylla, kum ka jingpyniaid ia ka kam ruh kan long kaba suk bha” ula ong.
Ula ong, ruh ba kane ka jingkhaii ia u sying kam dei satia kaba tang mynta ka sien hynrei yn dang sakhi bun shuh shuh ia ka jingkhaii ha ki snem kiban dang wan.
.){kind=link}