Shillong, Rymphang 25: Ka National People’s Party (NPP) kala rai ban thaw ia ka Executive Committee ba thymmai ka Jaintia Hills Autonomous District Council(JHADC) hadien ka jingioh jingkyrshan na ki 18 ngut ki MDC.
Haba pynbna ia kane hadien ba pyniaid ia ka jingialang ha ka sngi Nyngkong, u General Secretary ka NPP bad Symbud Myntri Rangbah Bah Sniawbhalang Dhar ula ong “Ngi ai khublei ia ki paidbah ka Ri-lum Jaintia ba ki don ka jingngeit bad jingshaniah ha ka NPP da kaba rai pynjop haduh 13 seat”.
Ula pyntip ba ka jingdon paid jong ka NPP kala kiew sha ka 14 ngut hadien ba ka MDC shimet na Rymbai-Khliehriat kong Violet Lyngdoh kala wan pyniasoh sha ka party.
“Ngi la iashong jingialang ruh bad ki paralok ba iatreilang-United Democratic Party (UDO) kaba don 3 seat bad u MDC shimet na Jowai South Bah Moonlight Pariat bad da ka jingkyrshan jong ki, ngi la rai ban thaw ia ka EC ba thymmai ha JHADC ha ka jingdon paid ba 18 ngut ki MDC” ula ong.
U Bah Sniawbha ula pyntip ba ka jingialang kala rai ban jied biang ia u Bah Thombor Shwat kum u Chief Executive Member (CEM) ka JHADC.
Halor ka jinglehsniew ka party ha ka elekshon KHADC, u Bah Sniawbha ula ong “Ngi la ioh tang 4 seat na Khasi Hills. Ngin sa shongbishar ban wad ia ki daw”.
Haba kyntait ia ka jingkynnoh ka VPP halor ka jingpyndonkam ia ka bor met ha Ri-lum Jaintia,une u Nongialam ka NPP ula ong “Ki (VPP) ioh 17 seat na ri-lum Khasi, hato ka mut ba ki pyndonkam ia ka bor met?. Namar kata, kam ju don satia ba kum kata ha ka sain pyrthei, ki paidbah kila pyndonkam iala ka jong ka hok”.
Nalor kane, ula ong “Ka VPP kala jop tang 17 na ka 29 constituency ha Ri-lum Khasi. Ka jingkyrshan iaki kala hiar bha namar ha ka elekshon MP ba dang shu dep, kila jip na baroh 29 constituency ha Ri-lum Khasi. Tang hapoh ka 8-9 bnai, kila lah ban jop tang 17 na ka 27 seat”.
U Bah Sniawbha u pyntip ruh ba ka jingialang jong ka MDA kan long lashai ka sngi ban iakren halor ka elekshon ADC.
 kala rai ban thaw ia ka Executive Committee ba thymmai ka Jaintia Hills Autonomous District Council(JHADC) hadien ka jingioh jingkyrshan na ki 18 ngut ki MDC.){kind=link}