Shillong, Rymphang 24: Tang 4 ngut ki MDC jong ka samoi ban leit noh, kila wan phai biang kum ki MDC ha kane ka samoi ba thymmai jong ka Iingdorbar Thaw Ain ka Khasi Hills Autonomous District Council (KHADC).
Haduh 19 ngut ki MDC jong ka samoi bala lah, kila iakhun ia kane ka elekshon KHADC ba niew vote hynne ka sngi Nyng kong bad na kine, tang 4 ngut kila ioh ia ka jingjop bad 15 ngut kila shah rem kynthup u Chief Executive Member (CEM) Bah Pyniaid Sing Syiem, DyCEM Bah PN Syiem bad u Chairman Bah Lamphrang Blah.
Ki MDC kiba dang jop biang ki kynthup ia ka Kong Grace Mary Kharpuri jong ka NPP, kaba la jop la haduh saw samoi na Nongshken constituency, u Bah Alvin K Sawkmie jong ka NPP na Mawsynram, u CEM barim bad MDC ka UDP Sohra Bah Titosstarwell Chyne bah u MLA /MDC ka UDP na Ranikor Bah Pius Marwein.
Ka Kong Grace kala jop da 3313 vote ia u kyrtong ka VPP ba wan ba-ar Bah Mabhalang Thabah, u Bah Alvin Sawkmie ula jop da 5035 vote ia u kyrtong ka VPP ba wan ba-ar Bah Ruseivan Shangpliang, u Bah Titosstar Well Chyne ula jop da 863 vote ia u kyrtong ka VPP Bah John W Thabah bad u Bah Pius ula jop da 2899 ia u kyrtong ka NPP Bah Mandilost Nongbri.
Saw ngut ki MDC barim jong ki samoi treikam bala leit noh ka KHADC kila wan phai biang mynta kum ki MDC ha kane ka kynti bad kine ki kynthup ia ka Kong Rona Khymdeit (NPP) na Nongpoh, Bah Ricky Shullai (IND) na Laban –Mawprem, Bah Srally Rashir (HSPDP) na Mawshynrut bad bah Equator L Nongrang (UDP) na Mairang constituency.
Lai ngut ki Dkhot ka Iingdorbar Thaw Ain ka Jylla (MLA) kila jop ha kane ka elekshon MDC ka KHADC bad bat mynta ia ka kam MLA bad MDC.
Kine ki lai ngut ki MDC ki dei u Bah Sosthenes Sohtun (NPP) na Jirang Constituency, Bah Synshar Kupar Lyngdoh (UDP) na Sohiong bad u Bah Pius Marwein (UDP) na Ranikor (Langrin).
.){kind=link}